Keyfiyyətli və etibarlı avtomobil modelləri ilə məşhurlaşan Toyota brendi artıq daha çox mənzilə sahib olan elektromobillər təklif edəcək. Belə ki, Toyota brendi yeni batareya texnologiyası olan qatı halda olan batareyalara keçid edəcəyini açıqlayıb. Həmçinin şirkət verdiyi açıqlamada bildirib ki, artıq elektromobillərin yürüyüş məsafəsi artacaq və xərcləri azalacaq. Ümumiyyətlə Toyota yeni texnologiyası ilə elektromobil bazarındakı Tesla və BYD kimi nəhənglərlə rəqabət aparmağı planlayır.
Beləliklə yapon avtomobil nəhəngi 2026-cı ildən başlayaraq daha uzun yürüyüş məsafəsi və daha sürətli şarj imkanı verən yeni qatı halda olan batareyalara keçid edəcək. Toyota artıq litium-ion batareyalardan imtina edəcək. Qeyd edək ki, qatı halda olan batareya texnologiyalarında əsasən uzunömürlülük problemi mövcuddur. Bununla bağlı isə Toyota uzunömürlülük problemini aradan qaldıracağını bildirib. Həmçinin Toyota 2027-2028-ci ildə bu batareyaları kütləvi istehsal edəcək. Bildiyimiz kimi, qatı halda olan batareyalar bazarda mövcud olan litium-ion batareyalardan daha çox enerji saxlaya bilir. Həmçinin bu batareyalarda isinmə problemi olmadığı üçün daha sürətli şarj ola bilirlər. Lakin bu batareyalar olduqca bahalıdır.
Toyota şirkətinin yeni batareya texnologiyasına keçid etməsi də məhz elektromobil qiymətlərində özünü göstərəcək. Lakin elektromobillərin qiyməti artsa da onların təklif etdiyi yürüyüş məsafəsi də artacaq. Hətta Toyota 1000 km yürüyüş məsafəsinə sahib olan elektromobillər istehsal edəcəyini xəbər verib. Hətta bu elektromobilləri sadəcə 10 dəqiqədə sürətli şarj etmək mümkün olacaq. Təbii ki, bütün bu xüsusiyyətlər elektromobilin qiymətini daha arxa plana salacaq.
