Şəxsiyyət bilinməyən bir xaker tərəfindən Tesla avtomobillərinin “Elon Mode” adlı əllər-sərbəst idarə etməyə imkan verən bir rejim aşkar edilib. Twitter-də greentheonly ləqəbli istifadəçi adından çıxış edən xaker, elektromobilinin proqram kodunu araşdırıb, funksiyaları rəsmi olaraq istifadəyə verilməzdən əvvəl aşkar etməsi və gizli funksiyaları açıqlaması ilə tanınır. Belə ki, xaker bu dəfə də Tesla-nın Full Self-Driving (FSD) proqram təminatında istifadə edilən və sürücüdən heç bir diqqət tələb etməyən gizli “Elon Mode” adı verilən funksiyanı üzə çıxarıb.
FSD proqramı, beta variantında saxlanılmış elektrikli avtomobil istehsalçısının qabaqcıl avtopilot imkanlarına malik sistemidir. Bu avtopilotu almaq üçün isə tək səfərlik 15.000 dollar və ya aylıq 199 dollar tələb edilir. Lakin FSD nə qədər azad elektromobili idarə edə bilsə də mütəmadi olmaqla sürücü sükana toxunmalıdır. Xaker Twitter-də gizli avtonom idarəetmə funksiyasını tapıb aktivləşdirdikdən sonra sınaqdan keçirdiyi videonu yayımlayıb. Tesla-nın avtopilot sistemi sürücülərdən yola diqqət yetirdiklərini təsdiqləmək üçün sükanı tutmalarını tələb edir.
Sürücülərin yola baxdığından əmin olmaq üçün güzgünün üzərində daxili kamera ilə daimi monitorinq də həyata keçirilir. Tesla avtomobilləri FSD aktiv olduqda sürücü yola baxmırsa və ya sükanı saxlamırsa, davamlı xəbərdarlıq göndərir. Elon Mode funksiyasını kəşf edən istifadəçi onu aktivləşdirdikdən sonra avtomobili təxminən 965 kilometr sınaqdan keçirdiyini və sistemlərin heç bir xəbərdarlıq etmədiyini bildirib. Yəni, elektromobil sadəcə hərəkətini davam etdirib.
FSD xüsusiyyətinin son istifadəçilərə gəlib çatacağı, yoxsa proqram təminatının sınağı üçün istifadə edilən gizli xüsusiyyət olub-olmadığı hələ də məlum deyil. Xaker bildirir ki, bu versiyada avtomobil bəzi xətalar da göstərir. Həmin xətalar isə ani sürətlənmə və yavaşlama kimi müşahidə olunur. Bu isə avtopilotla bağlı keçmiş iradların doğru olduğunu təsdiqləyir. Əlavə olaraq qeyd edək ki, elektromobil də nisbətən köhnə buraxılış kimi müşahidə olunur və üzərində ən yeni texnologiyaların olmadığı təxmin edilir.
