Tesla avtomobilləri uzun müddətdir ki, avtomobil funksiyaları, naviqasiya, musiqi, internetdə gəzinti və daha çoxunu bir sistemdə təklif edən öz multimedia sistemi vasitəsilə fəaliyyət göstərir. Beləliklə, Tesla, avtomobil sənayesində standart hala gələn Apple CarPlay dəstəyini təklif etməyən azsaylı istehsalçılardan biridir.
Lakin, görünən odur ki, Tesla bu siyasəti dəyişdirməyə hazırlaşır. Məsələ ilə tanış mənbələrə görə, Apple CarPlay dəstəyi hazırda Tesla avtomobillərində sınaq mərhələsindədir. Şirkətin bu xüsusiyyəti yaxın aylarda tətbiq etməyi planlaşdırdığı barədə şayiələr yayılsa da, hələlik dəqiq buraxılış tarixi açıqlanmayıb. Tesla-nın CarPlay tətbiqi əksər avtomobillərdə mövcud olan tam ekran təcrübəsindən fərqli olaraq, Teslanın öz interfeysi daxilində pəncərə kimi fəaliyyət göstərəcək. Bundan əlavə, dəstəklənən versiya bu il buraxılan CarPlay Ultra deyil, standart simsiz CarPlay olacaq.
Bu addımın Tesla satışlarına təsir edib-etməyəcəyi məlum deyil. Şirkətin öz sistemi olduqca inkişaf etmiş bir sistemdir. Bəzi istifadəçilər Apple CarPlay kimi əlavə inteqrasiyaya ehtiyac olmadığına inanırlar. Bununla belə, CarPlay xüsusiyyətinin olmadığı üçün onu almadıqlarını deyən potensial müştərilər də var. Ümumiyyətlə, Tesla-nın rəsmi olaraq dəstəklənmədiyi bir çox ölkələrdə Tesla funksiyalarının məsələn xəritə və naviqasiyanın tam fəaliyyət göstərməməsi kimi problemlərin çıxış yolu məhz Apple CarPlay ola bilər. Bu isə dolayı yollarla Tesla almaq istəyən amma tərəddüd edən bir çox Tesla həvəskarına motivasiya verəcək.
