İnvestorlar Çinin sürətlə böyüyən tamamilə qatı hal batareya sektoruna axın etdikcə, sənaye liderləri daha ehtiyatlı açıqlamalar veriblər. Sichuan şəhərində keçirilən 2025-ci il Dünya Enerji Batareyası Konfransında Çinin aparıcı batareya və avtomobil şirkətlərinin mütəxəssisləri elektrik mobilliyində növbəti inqilab hesab edilən bu texnologiyanın hələ də genişmiqyaslı kommersiyalaşdırmadan uzaq olduğunu vurğulayıblar. Belə ki, Çinlilər qatı hal batareyaların 2030-cu ildən tez sənayedə mövcud olamayacağını deyir.
Konfransdan əvvəl yüksək səviyyəli forumda çıxış edən Çin qatı hal Batareya Sənayesi-Universitet-Tədqiqat Əməkdaşlıq İnnovasiya Platformasının vitse-prezidenti Vu Çenqsin sənayenin əhəmiyyətli irəliləyiş əldə etməyə çalışdığını, lakin texnologiyanın hələ də çoxsaylı çətinliklərlə üzləşdiyini bildirib. Vu qeyd edib ki, hərtərəfli elmi təhlil, avadanlıqların hazırlanması və dizayn tədqiqatları başa çatana qədər kommersiya istehsalı mümkün olmayacaq və bunun uzunmüddətli tədqiqat prosesi olduğunu vurğulayıb.
Çin ardıcıl səkkizinci ildir ki, dünyanın ən böyük elektrik batareyası istehsal gücünə sahibdir. 2025-ci ilin yanvar və sentyabr ayları arasında daxili enerji batareyalarının satışları 786 GVt/saata, ixrac isə 129 GVt/saata çatıb. Bu rəqəmlər illik müqayisədə müvafiq olaraq 48,9% və 32,75% artımı təmsil edir. Lakin ekspertlər qeyd ediblər ki, bu güclü artıma baxmayaraq, tam bərk vəziyyətdə olan batareyaların kommersiyalaşdırılması hələ illər çəkəcək. SVOLT Energy Technology şirkətinin baş direktoru və sədri Yanq Honqsin bildirib ki, nümayiş tətbiqləri 2027-ci ilə qədər məhdud sayda nəqliyyat vasitəsində tətbiq oluna bilər, lakin genişmiqyaslı istehsal daha aşağı xərclər və daha yetkin təchizat zəncirini tələb edir. Yanq faktiki kütləvi istehsalın 2030-cu ildən sonraya qədər təxirə salına biləcəyini proqnozlaşdırıb.
Changan Automobile şirkətinin vitse-prezidenti və Deepal brendinin prezidenti Denq Çenqhao daha ehtiyatlı bir proqnoz paylaşıb. Denqin sözlərinə görə, 2030-cu ilə qədər genişmiqyaslı istehsal “ən optimist ssenari” olsa da, daha real bir qiymətləndirmə 2035-ci il ətrafındadır. O, həmçinin bildirib ki, internetdə tez-tez “böyük irəliləyişlər” kimi təqdim edilən bəzi kiçik irəliləyişlər əslində şişirdilib. Denq vurğuladı ki, maye və yarı bərk batareya texnologiyaları hələ də əhəmiyyətli inkişaf potensialına malikdir və bu sistemlər vaxtından əvvəl ləğv edilməməlidir. Xüsusilə yarı bərk batareyalar sürətlə populyarlıq qazanır. Yanq mövcud maye və yarı bərk batareyaların yaxın üç-beş il ərzində nəqliyyat vasitəsi almağı planlaşdıran istehlakçılar üçün hələ də əla seçim olduğunu bildirdi. Denq həmçinin maye və bərk sistemləri birləşdirən hibrid batareyaların enerji sıxlığının və təhlükəsizliyin yaxşılaşdırılmasında təkamül addımı olduğunu və maye sistemlərdə innovasiya üçün hələ də imkanların olduğunu bildirib.
Çin Avtomobil Mühəndisləri Assosiasiyasının prezidenti Çjan Cinhua konfransın açılışında “2030-cu il Güc Batareyasının İnkişafı Hesabatı”nı təqdim edərək hibrid maye-bərk batareyaların 2030-cu ilə qədər geniş şəkildə kommersiyalaşdırılacağını, tam bərk vəziyyətdə olan batareyaların isə eyni dövrdə pilot validasiya və məhdud tətbiq mərhələlərini tamamlayacağını proqnozlaşdırıb.
