Sony şirkətinin Honda əməkdaşlığında elektromobil istehsal edəcəyi artıq uzun bir müddətdir ki, bizə məlumdur. Sony Honda Mobility adı verilən iki Yapon şirkətinin ortaq brendi, AFEELA rəsmi olaraq bu gün CES 2022 sərgisində qarşımıza çıxarıldı. AFEELA konsepti, əslinə qalsa konseptdən daha çox seriya istehsalına hazır bir məhsul kimi görünür. Bunu qüvvətləndirən əsas detal isə elektromobilin dizayn elementlərinin çox da absurd olmaması və satışa çıxarılma tarixinin açıqlanmasıdır. Belə ki, bu elektromobilin ilk prototipi hesab edilə biləcək Vision-S oxşar gövdə üzərində çox qarışıq bir dizayna sahib idi. Bəlkə də həmin dizayn çoxlarınıza daha xoş görünə bilər. Lakin görünüşün sadələşdirilməsi həm aerodinamika, həm xərclər cəhətdən daha böyük üstünlük deməkdir.
Sony AFEELA, futuristik üslubu və sadəliyi ilə diqqət çəkir
Sony və Honda şirkətlərinin ortaq layihəsi olan AFEELA tam olaraq “yeriyən multimedia cihazı” prinsipinə malikdir. Radiator barmaqlığı elektromobil olduğu üçün ləğv edilib. Yerini isə ön hissədə fənərləri birləşdirən ekrana ötürüb. Bəli, elektromobilin ön hissəsində müxtəlif məlumatları görə biləcəyiniz bir ekran yerləşdirilib. Həmin ekranda elektromobilə daxil olmadan batareya vəziyyəti, hava və salon temperaturu kimi informasiyaları öyrənmək, mesaj qoymaq mümkün olacaq. Əks halda isə müxtəlif rəng kombinasiyaları yarada və zövqünə görə işıqlandırma təyin edə biləcəksiniz.
Elektromobilin əsas məqsədi avtonom sürüşə hazır olmaqdır. Ona görə də Sony şirkəti bu elektromobilinə lidar, radar, kamera, ultrasəs və.s olmaqla 40-dan çox sensor quraşdırıb. Elektromobilin istənilən nöqtəsinə təmas edə biləcək maneələr bu sensorlarla aşkarlana biləcək. Bu da avtonom sürüş zamanı olduqca yüksək təhlükəsizlik təminatı deməkdir.
Sony AFEELA texniki təminat cəhətdən “Snadpragon Digital Chassis” platforması üzərinə qurulub. Yəni smartfonlarımızda olduğu kimi elektrmobillərimizdə də yaxın gələcək Qualcomm şirkəti ilə iç-içə olacaq. Epic Games tərəfindən Unreal Engine ilə hazırlanan istifadəçi interfeysinə və elektromobilin “beyninə” məhz sahib olduğu Snapdragon Digital Chassis güc verəcək.
Elektromobilə ilkin ehtimallara görə 400 kVt gücə malik 2 ədəd 536 at gücü hasil edən elektrik mühərrikləri quraşdırılacaq. Bir elektrik mühərriki öndəki 2 təkəri, bir elektrik mühərriki isə arxadakı 2 təkəri hərəkətə gətirəcək. Batareya paketi naməlum olduğundan yürüyüş məsafəsi naməlumdur. 0-100 Km/s sürətlənməsi təqribi 4.8 saniyə olub, maksimum sürəti 240 km/s ilə limitləndiriləcək. Təbii ki, elektromobil satışa çıxarıldıqdan sonra bu detallar daha da dəqiqləşəcək.
Sony AFELLA modeli 2025-ci ildə ön sifarişə açılacaq. 2026-cı ildən Amerika, Avropa və Yaponiyada satışda olacaq. Elektromobilin istehsalına Honda şirkətinin ABŞ-dəki istehsal müəssisələrindən birinin cavabdeh olacağı gözlənilir.
