Gogoro şirkəti yeni texnologiyası ilə elektromobillərin ən böyük problemi olan batareya və şarjı aradan qaldıra bilər. Belə ki, ötən gün təqdim edilən yeni portativ və dəyişdirilə bilən batareyalı mini elektromobil şarj problemini həll edə bilər. Qeyd edək ki, yeni elektromobil Yaponiya avtosalonunda təqdim edilib. Bu elektromobilin ən maraqlı xüsusiyyəti isə onun oyuncaq maşınlar kimi, dəyişdirilə bilən və portativ batareyaya sahib olmasıdır. Görünən odur ki, avtomobillər nəhəngləri gələcəkdə sürətli şarj texnologiyasına alternativ olaraq dəyişdirilə bilən batareyadan da istifadə edəcək.
Beləliklə, ötən gün Yaponiya avtosalonunda Foxconn tərəfindən yaradılmış MIH konsorsiumu yeni mini avtomobil konseptini elan etdi. Portativ və dəyişdirilə bilən batareyalı bu elektromobil Gogoro şirkətinin texnologiyasından istifadə edərək, yüzlərlə kilometr məsafə qət edə bilir. Qeyd edək ki, Gogoro şirkətinin batareyaları hazırda bir çox skuterlərdə istifadə olunur. Artıq elektromobillərin şarjının 100% olmasını gözləmədən, onun batareyasını saniyələr içində dəyişmək mümkün olacaq. Bu əsasən istifadəçilərin şəhər içində rahat və sürətli şəkildə elektromobillərindən istifadə etməsi üçün nəzərdə tutulub.
Qeyd edək ki, batareyalar kiçik ölçüdə olsa da, şəhər içində istifadəçilərin rahatlıqla istədiyi ünvana çatmasına kifaəyət edər. Hələlik bu elektromobilin nə qədər məsafə getdiyi dəqiq elan edilməsə də, müqayisə üçün qeyd edək ki, eyni dəyişdirilə bilən və portativ batareyalı elektrikli skuterlər 160-170 km məsafə qət edə bilir. Yeni mini elektromobilin də ən az bu qədər məsafə qət edə biləyi gözlənilir.
