Texnologiya sahəsində keyfiyyətli ekran panelləri ilə tanınan Samsung brendi əhatə dairəsini genişləndirir. Belə ki, məşhur MINI brendi öz elektromobillərində Samsung ekranları istifadə etməyi planlayır. BMW brendinin altbrendi olan MINI gələn illərdə təqdim edəcəyi futuristik dizaynlı hetçbek elektromobillərində koreyalı texnologiya nəhənginə məxsus OLED ekranlar istifadə edəcək. Şübhəsiz Samsung brendinin OLED ekranlarının keyfiyyəti ən üst səviyyədədir. Hətta Apple kimi rəqib brendlər belə, öz modellərinin ekran panelləri üçün Samsung brendindən kömək alır.
Avtomobil sahəsində köklü tarixə sahib olan və daim keyfiyyətli modelləri ilə tanınan MINI brendi də Samsung ekranları ilə bazarda üstünlük əldə etməyə çalışır. Hətta hər iki şirkət müvafiq mövzuda əməkdaşlıq müqaviləsi də imzalayıb. Açıqlamaya görə Samsung imzalı 9.45 düymlük dairəvi OLED ekranlar ingilis MINI brendinin yeni təqdim edəcəyi bütün elektromobillərinə istifadə olunacaq. Ümumiyyətlə MINI brendi ötən günlərdə yeni təqdim edəcəyi elektromobili ilə bağlı bir-neçə görüntü paylaşmışdı.
Paylaşılan görüntülərdə isə şirkətn ənənəyə sadiq qalaraq əvvəlki dizaynını davam etdirəcəyi məlum olmuşdu. Lakin bu dəfə texniki cəhətdən yenilənmə edəcək. Belə ki, ekran panellərindən tutmuş, multimedia sisteminə qədər hər bir detal yenilənəcək və daha futuristik olacaq. Maraqlısı budur ki, bu yenilik brendin 65 illik dizaynını heç pozmur. Hətta timelapse videosunda da bu vəziyyət bariz bəlli olur. Bundan əlavə elektromobil Android əsaslı MINI OS 9 interfeysinə sahib olacaq və 5G dəstəkləyəcək.
