Mercedes-Benz EQE SUV elektromobili, ötən il təqdim olunan EQE elektromobilinin yeni versiyasıdır. Bu model, şirkətin istehsal edəcəyi 4-cü elektromobil kimi qeyd olunur. Mercedes, EQE seriyası debüt edərkən SUV versiyanın da təqdim ediləcəyi xəbərini vermişdi. Buna görə də, bu elektromobil barəsində insanlar əvvəlcədən xəbərdar olmuşdular. Lakin, bu modelin dizaynının ehtimal olunandan kifayət qədər fərqli olduğunu söyləmək mümkündür.
Mercedes-Benz EQE SUV elektromobilinin xüsusiyyətləri
Futuristik görünüşlü eksteryer və texnoloji xüsusiyyətlərlə dolu interyeri ilə xarakterizə olunan elektromobil üç versiyada buraxılacaq. Yeni EQE SUV sedan versiyasından 9 santimetr daha qısa təkər bazasına malikdir. Mercedes bunun elektromobilə daha çox manevr imkanı verəcəyini söyləyib. Şirkət həmçinin bildirib ki, elektromobil öz sinfində ən böyük salon həcminə sahib olacaq. Elektromobildə üç fərqli elektrik mühərriki variantı olacaq. Yeni SUV tam enerji ilə 550 Km yol vəd edir. Təbii ki, praktikada bu məsafəyə çatmaq mümkün olmaya bilər. Bu model, həmçinin Mercedes şirkətinin AMG seriyasının ilk elektrikli SUV modeli kimi də qeyd olunur.
EQE E-class modelinin SUV variantı olduğu kimi, daxili yanma mühərrikli GLE modelinin də elektrikli analoqu olacaq. Uzunluğu 191.5 düym, eni 76.4 düym və hündürlüyü 66.4 düym olan elektromobil digər SUV modellərindən bir qədər qısa və alçaqdır. Hələ ki, elektromobilin boş çəkisi haqqında məlumat yoxdur. Vizual olaraq isə EQE SUV qısa çıxıntıları, uzun təkər bazası və sadələşdirilmiş ümumi dizaynı ilə diqqətləri üzərinə cəlb edir. Daxili yanma mühərrikli avtomobillərin olmazsa olmazı olan radiator barmaqlığı isə Mercedes klassikası olaraq qara panel ilə əvəz olunub. Arxa hissədə olan LED işıq çubuğunun elektromobilin dizaynına sadəlik qatdığını da vurğulamaq lazımdır.
Yeni elektromobil 3 versiya ilə bazara çıxacaq. Həmin versiyalar isə 350+, 350 4Matic və 500 4Matic olaraq qeyd edilib. Standart paketdə elektrik mühərrik 288 at gücü və 565 fırlanma anı hasil edəcək. 350 4Matic paketində ön və arxa ötürməli 2 mühərrik əlavə ediləcək. Əlavə elektrik mühərrikləri fırlanma anını 765 nm-ə dək artırır, lakin mühərrik başına düşən at gücü cəhətdən dəyişiklik yoxdur. 500 4Matic paketində isə 536 at gücü və 858 fırlanma anı hasil edən iki mühərrikli sistem təklif olunur. Elektromobillərin 100 km/saat sürətə çatması üçün müvafiq versiyalarında 6.3, 6.2 və 4.6 saniyə lazımdır. Halbuki, variantdan asılı olmayaraq son sürət 210 km/saat olaraq limitlənib. AMG paketində isə 617 at gücü və 950 nm fırlanma anı hasil edən elektrik mühərriki təklif olunur. Yeni elektromobillərin hər birinə 90 kVts həcmində batareya paekti ilə quraşdırılıb. Qiyməti açıqlanmasa da 70.000-80.000 dollar səviyyələrində olmalıdır.
