Hyundai, Cənubi Koreyanın Ulsan şəhərində 2026-cı ildə istifadəyə veriləcək 200.000 avtomobil istehsal gücünə malik elektrik avtomobil fabrikinin tikintisini davam etdirir. Qeyd edək ki, şirkət bu nəhəng müəssisəsində yeni nəsil elektrik avtomobilləri üçün HyperCasting metodundan istifadə edəcəyini təsdiqləyib. Beləliklə, Hyundai brendi yeni nəsil elektromobillərində HyperCasting metodu ilə vahid şassiyə keçməyi planlaşdırır.
Təkcə bu il Cənubi Koreyaya 11,3 milyard dollar sərmayə qoyacaq “Hyundai” elektromobil istehsal gücünü əhəmiyyətli dərəcədə artırmağı planlaşdırır. Şirkət həmçinin innovativ avtomobil istehsalı üsullarına sərmayə qoyur. Əvvəlcə, Tesla tərəfindən irəli sürülən vahid şassiyə keçid etməyi düşünən Hyundai, bütün avtomobil gövdələrini tez və səmərəli şəkildə istehsal etmək üçün Ulsan fabrikində yeni hipercasting qurğusu inşa edəcək.
Bununla da, onlarla hissənin bir araya gətirilməsi ilə yaradılan şassinin istehsalı nəhəng alüminium tökmə maşınları ilə tək parça olaraq həyata keçiriləcək. Bu dizayn dəyişikliyi şirkətin 2026-cı ildə satışa çıxarılacaq yeni nəsil elektrik avtomobillərində tətbiq olunacaq. Vahid şassi avtomobil istehsalını sürətləndirməkdən əlavə, daha yüngül, daha ucuz və güclü kuzovlu avtomobillərin istehsalına da imkan verəcək. Qeyd edək ki, son dövrlərdə Hyundai brenid xüsusilə elektrikli avtomobil sənayesində özünəməxsus dizayna sahib olan elektromobilləri və performansı ilə də seçilir. Yeni metoda keçiddən sonra isə şirkətin sənayedə öz mövqeyini gücləndirəcəyi düşünülür.
