Çinin avtomobil nəhəngi Geely, ilin birinci yarısında şarj edilə bilən hibrid və tam elektriklə işləyən avtomobillərin satışlarının əhəmiyyətli dərəcədə artdığını açıqlayıb. Bundan əlavə, şirkətin gəlirləri əvvəlki ilin eyni dövrü ilə müqayisədə 29 faiz artaraq 58,12 milyard yuana (8,5 milyard dollar) çatıb.
Şirkətin məlumatlarına görə, 2022-ci ilin birinci yarısında şarj edilə bilən hibrid və elektrikli avtomobil satışları 398 faiz artaraq 109.000 ədədə çatıb. Tam elektrikli avtomobil satışları isə tam olaraq 13.851 ədəddən (2021-ci ilin birinci yarısı) 520 faiz artaraq 85.820 ədədə (2022-ci ilin birinci yarısı) çatıb.
Rəqəmlərdən də göründüyü kimi Geely, ilk yarıda PHEV (şarj edilə bilən hibridlərə) nisbətən daha çox tam elektrikli avtomobillər satıb. Belə ki, bu modellər arasında elektrikli avtomobillərin payı 69%-dir. Şirkətin elektrik avtomobili və PHEV satışları artsa da, ümumi satışları ötən ilin eyni dövrü ilə müqayisədə 9 faiz azalıb. Bunda daxili yanma mühərrikli (ICE) avtomobillərdəki 20% azalmanın böyük payı var. Şirkət vəziyyəti qeyri-elektrik modellərə marağın azalması və davam edən Covid–19 məhdudiyyətləri ilə əlaqələndirir.
Gəlirlərin artmasına baxmayaraq şirkətin xalis mənfəətinin də təxminən 35% azaldığını görürük. Bildirilir ki, bu vəziyyətin də səbəbi elektrikli nəqliyyat vasitələrinin qazancının hələ də ICE modelləri ilə eyni olmaması ilə bağlıdır. Bununla belə, şirkət elektrik avtomobillərində qazanc əldə etmək üçün əsasən Geometry və Zeekr markalarına güvənir. Bu mövzuda düşüncələrinizi rəylərdə qeyd etməyi unutmayın!
