Ford şirkəti elektromobillərin sürətlə böyüdüyü günümüzdə avtomobilin damında ehtiyat batareya yerləşdirməyə imkan verən sistemi rəsmi olaraq patentləşdirib. Belə ki, ABŞ-nin avtomobil nəhəngi elektrik avtomobillərinin çeşidliliyinin artdığı, lakin yürüyüş məsafəsinin az olduğu, eyni zamanda uzun məsafə qət edən insanlara xitabən belə bir “powerbank” hazırlayır. Şarj stansiyalarının nadir olduğu ərazilərdə sürücüləri rahatlaşdıracaq yeniliklə bağlı detallar artıq ictimaiyyətə də yayımlanıb.
ABŞ Patent və Ticarət Nişanları İdarəsinin qeydlərində Ford Bronco tipli avtomobili göstərən batareya paketi əsaslı patent müəyyən edilib. SUV tipli avtomobilin dam örtüyünün fərqləndiyi görünür. Belə ki, dam baqajı kimi görünən hissədə ehtiyat batareya var, arxasında isə böyük bir ehtimalla elektromobillərə güc verən əsas batareyanı bəsləyəcək kabel mövcuddur. Yəni birbaşa smartfonlarımızı doldurmaq üçün istifadə etdiyimiz powerbank həlli ilə bənzə texnologiyadan söhbət gedir.
Patent təsvirinə əsasən, ehtiyat batareya şarj stansiyalarının az olduğu ərazilərə getməzdən əvvəl avtomobilə quraşdırılacaq şəkildə təsvir edilir. Ford həmçinin batareya paketini soyutmaq üçün dam blokunu hava kanalları ilə təchiz etməyi də unutmayıb. Patent o qədər detallı hazırlanıb ki, şirkət həmçinin su və ya tozun korpusa daxil olmasının qarşısını almaq üçün bölməni sürücünün istəyi ilə də açılıb-bağlana bilən aktiv klapanlarla təchiz etməyi də nəzərdən keçirib. Tavan bloku poliuretan köpükdən hazırlanacaq. Bu, istilik enerjisi səviyyəsini idarə etməyə və daxili sərin saxlamağa kömək edəcək.
