İllərdir elektriklə işləyən avtomobillərə üstünlük verməyən istifadəçilər, elektromobillərin yüksək qiymətləri, sürmə məsafəsi, şarj sürəti və infrastrukturla bağlı narahatlıqları mühüm səbəb kimi göstəriblər. Lakin yeni bir araşdırma göstərir ki, elekromobil qiymətləri əvvəlki qədər bahalı deyil və onlarla daxili yanma avtomobilləri arasında qiymət fərqi gün keçdikcə azalır.
Sənaye analitiki Jato Dynamics-in hesabatına görə, elektromobil qiymətlərinin azalması ilə elektrik və daxili yanma mühərrikləri arasındakı fərq indiyədək ən dar nöqtəyə qədər daralıb. ABŞ-da 2021-ci ildə 50% qiymət fərqi olduğu halda, 2022-ci ildə 33%-ə, keçən il isə 15%-ə düşüb. Ölkədə elektrik avtomobillərinin qiymətləri inflyasiya nəzərə alındıqda 2018-ci illə müqayisədə 25% ucuzlaşıb. Habelə, Avropa və Çində eyni dövrdə elektrikli avtomobillərin qiymətləri 15% ucuzlaşıb. Avropada daxili yanma ilə işləyən avtomobillərin orta qiyməti 7% artıb. Qitədə elektriklə işləyən və yanma mühərrikli avtomobillər arasında qiymət fərqi keçən il 22%-ə düşüb.
Bununla belə, elektrik avtomobillərinin qiymətləri regionlara görə çox dəyişir. Məsələn, Polestar 4 Çində 52 190 avroya, ABŞ-da 59 452 avroya, Avropada 69 300 avroya satılır. MG4-ün qiyməti Çində 18 245 avro, Avropada isə 30 960 avro təşkil edir. Buna görə də, çinli müştərilər Avropa və ABŞ-dakı müştərilərdən daha ucuz qiymətə elektrikli avtomobillərə çıxış əldə edə bilirlər.
