30–31 avqust tarixlərini əhatə edən “EkoKarvan – elektrik avtomobillərin Laçına səfəri” adlı ekoloji yürüş-festival baş tutub. AZƏRTAC-ın məlumatına görə, Bakıdan Laçına doğru yola düşən EkoKarvan tam elektrikli avtomobillərdən ibarət olub.
Laçın Rayonunda Bərpa, Tikinti və İdarəetmə Xidmətindən verilən məlumata görə, tədbirdə ümumilikdə 23 elektrikli avtomobil və 70-ə yaxın heyət iştirak edib. Yürüş 30 avqustda Bakıdan start götürüb və Şuşaya istiqamətlənib. Şuşada qısa dayanacaqdan sonra avtomobillər xüsusi polis müşayiəti ilə Laçına yola düşüblər. Günün sonunda Laçında qala-gecəsi təşkil olunub. Gecədə müxtəlif proqramlar, əyləncəli musiqi çıxışları və DJ performansları təqdim edilib.
Növbəti gün, 31 avqustda Laçında müxtəlif tədbirlər keçirilib. İştirakçılar əvvəlcə şəhər gəzintisində olublar, daha sonra Laçın yarmarkasına səfər ediblər. Günün ikinci yarısında isə Seyrangah ərazisində rəsmi tədbir proqramı təşkil olunub.
Laçına elektrik avtomobillərin səfəri Laçın rayon xüsusi nümayəndəliyinin dəstəyi, “Pultlu Maşın” komandasının təşkilatçılığı və sponsorların maliyyə dəstəyi ilə keçirilib. Keçirilən tədbirlərdə Laçın rayon xüsusi nümayəndəsinin köməkçisi Hüseyn Quliyev, festivalın təşkilatçısı İlkin Mustafayev, Avtomobil Dilerləri Assosiasiyasının fəxri prezidenti Natiq Zərbəliyev və Assosiasiyanın idarə heyətinin sədri Əyyub Əliyev çıxışlar ediblər. Baş sponsor Göyçay Süd və sponsor iVolt şirkəti tərəfindən hədiyyələr təqdim edilib.
