Bildiyimiz kimi, müxtəlif regionlarda fərqli ölkələr Çin elektromobillərinə qarşı müxtəlif vergi dərəcələri tətbiq edir. İndi isə qardaş ölkə Türkiyə Çin mənşəli benzin, dizel və hibrid avtomobillərinə də 50% həddində yüksək vergilər tətbiq edəcək. Qeyd edək ki, Türkiyə indiyə kimi yalnız Çin elektromobillərinə 40% vergi tətbiq edirdi. İyulun 7-dən etibarən isə Türkiyə vergiləri 50%-ə və ya ən az 7 min dollara qaldırır.
Qeyd edək ki, Çin istehsalı avtomobillər və elektromobillər son dövrlərdə müxtəlif məhdudiyyətlər ilə qarşılaşır. Belə ki, buna misal olaraq ABŞ və Avropa Birliyini misal göstərə bilərik. Daha əvvəl ABŞ Çin elektromobillərinə yüksək vergi dərəcəsi tətbiq edəcəyini elan etmişdi. Hökümətin bu addımı atmasının əsas səbəbi isə yerli elektromobillərə olan tələbatın aşağı düşməsi və bazarın Çin istehsalı elektromobillər tərəfindən zəbt edilməsi ilə bağlı idi. Bu qərardan sonra isə Avropa Birliyi də oxşar addım atdı. Lakin Avropada vəziyyət ABŞ-dan biraz daha fərqlidir.
Avropa bazarında mövcud olan elektromobillər hazırda Çin elektromobillərinə nəzərən çox bahadır. Analitiklər iddia edir ki, Avropada Çin elektromobillərinə 50% vergi də tətbiq edilsə Çin brendlərinin mənfəət marjası yüksək olduğundan bundan çox təsirlənməyəcək. Bununla yanaşı, bəzi Çinli elektromobil istehsalçıları Avropada fabrik açdığı üçün bu qərar onlara da təsir etməyəcək. Bundan əlavə qeyd edək ki, hazırda ölkəmizdə elektrikli avtomobillərə heç bir əlavə vergi rüsumu tətbiq edilmir.
