Çinli avtomobil istehsalçıları dünya üzrə bazar paylarını sürətlə artırsalar da, getdikcə artan rəqabətli bazarda irəlidə qalmaq üçün qiymətləri də davamlı olaraq aşağı salırlar. Çin bazarı xüsusilə şiddətli rəqabətdədir. Bununla belə, getdikcə daha çox insan bu rəqabətin qeyri-sağlam səviyyəyə çatdığına inanır. Xatırladaq ki, daha əvvəl, Volkswagen-in Çin üzrə meneceri Ralf Brandstätter iyul ayında “Çin avtomobil bazarında məntiq qalmayıb” deyərək təəccüblü bir açıqlama vermişdi. Görünən odur ki, Brandstätter bu məsələdə tək deyil. Çin hökuməti də bu vəziyyətdən getdikcə narahat olur. Beləliklə, Çin durmadan düşməyə davam edən avtomobil qiymətlərinin Çin iqtisadiyyatına mənfi təsir etməsindən narahat olub.
“The New York Times” qəzetinin yazdığına görə, Çinli avtomobil istehsalçıları qiymətləri durmadan aşağı saldıqları və mənfəət marjalarını sıxışdırdıqları üçün Çin hökuməti tədbirlər görür. Son həftələrdə Çin hökuməti avtomobil şirkətlərinin yüksək səviyyəli rəhbərləri ilə görüşərək, onlara rəqabətdə təmkinli olmağın zəruriliyi barədə xəbərdarlıq etdi. Qiymətləri davamlı olaraq aşağı salan şirkətlər rəqibləri qarşısında üstünlük əldə edə bilər, lakin bununla da bütün sektorun mənfəət potensialını məhv edirlər. Bundan əlavə, bir çox şirkəti növbəti beş il ərzində dəsmal atmağa məcbur edə biləcək və bütün Çin iqtisadiyyatına potensial zərər verə biləcək bir ssenari ortaya çıxır. Xi Jinping: Dağıdıcı daxili rəqabətin qarşısını almaq vacibdir
Bu tendensiyadan narahat olan Çin hökuməti təkcə şirkətlərlə deyil, həm də ən yüksək səviyyələrdə keçirilən görüşlərdə sektorda mövcud rəqabət vəziyyətindən narahatlığını dilə gətirib. İyulun 30-da İqtisadiyyat üzrə Siyasi Büronun iclasına şəxsən sədrlik edən Çin Prezidenti Xi Jinping, iclasdan sonra açıqladığı bəyanatda, “Sənaye daxilində öz nizam-intizamını gücləndirmək və dağıdıcı daxili rəqabətin qarşısını almaq vacibdir” deyə açıqlama verib.
Çin hökumətinin bu məsələyə müdaxilə etməsi təəccüblü deyil. Bu gün 50-dən çox Çin şirkəti elektromobil bazarında bir-biri ilə rəqabət aparır. Və bu şirkətlərin sayı getdikcə artır. Rəqabət gücləndikcə qiymətlər də aşağı düşür. Nəticədə çoxlu sayda avtomobil sata bilən şirkətlər belə istehsal xərclərini ödəməkdə çətinlik çəkirlər. Həqiqətən, hətta Çinin ən böyük avtomobil istehsalçılarından biri olan BYD, qiymətlərin düşməsi səbəbindən gəlirinin əvvəlki illə müqayisədə təxminən 30 faiz azaldığını açıqlayıb.
