Dünyanın ilk hibrid seriyası olan Toyota Prius xəttinin bu il 25 yaşı tamam olub. Yapon avtomobil nəhəngi olan Toyota şirkəti bu münasibət ilə seriyanın yeni hibrid avtomobilini təqdim edib. Seriyanın 5-ci nəsil modeli yeniləmiş dizaynı və müasir texnologiyaları ilə diqqətləri cəlb etməyi bacarıb. Qeyd edək ki, seriyanın ilk modeli olan NHW10 adlı model olub və 1997-ci ildə təqdim olunub. Həmin dövrdən bu yana dünyada 5 milyon Prius modeli satılıb. Son illərdə Toyota şirkəti elektromobillər üzərində işləməsinə baxmayaq, yeni nəsil Prius modelinin ənənəyə uyğun olaraq hibrid olmasına qərar verib.
Yeni Toyota Prius modelinin xüsusiyyətləri
Şirkətin əsas məqsədi yeni Toyota Prius modelinin yalnız aşağı yanacaq sərfiyyatına deyil həm də cəlbedici dizayna sahib olması idi. Görünən odur ki, şirkət məqsədinə çatıb. Belə ki, yeni modelin dizaynında ənənəvi Prius dizaynından imtina edilib. Yeni avtomobilin ön hissəssi əsasən elektrikli avtomobillərdə gördüyümüz üfüqi xəttli faralar ilə təchiz edilib. Avtomobilin böyük farasının belə sadə dizayna salınması ona futuristik görünüş bəxş edib. Hibrid avtomobilin arxa hissəsində isə yeni spoyler quyruğu əlavə olunub. Həmçinin yeni modelin ön kapotunun daha çox uzadılması və yeni 19 düymlük təkər diskləri ilə təchiz edilməsi onun ən çox sevilən yeniləmələrindən biri olub.
Beşinci nəsil Prius modelinin təkər bazası əvvəlki model ilə müqayisədə 50 mm uzadılaraq 2750 mm olub. Həmçinin yeni modelin uzunluğu 25 mm uzanaraq 4600 mm, eni 20 mm artaraq 1780 mm və nəhayət hündürlüyü 40 mm alçalaraq 1430 mm olub. Qeyd edək ki, 7 il əvvəl təqdim olunmuş Prius modeli TGNA modul arxitekturasında inşa edilmiş ilk model olmuşdu və indi yeni nəsil Prius TNGA platformasının təkmilləşdirilmiş versiyasını alan ilk model olub.
Beşinci nəsil hibrid avtomobilin interyerinə nəzər saldıqda bizi çox funksiyalı sükan, həmçinin 7 düymlük alətlər paneli qarşılayır. Bu alətlər paneli sükanın üstündə yerləşsə də, o artıq ön panelin mərkəzində deyil, sürücünün qarşısındadır. Ümumilikdə yenilənmiş interyer avtomobilin daxilində daha idman üslublu təəssürat yaradıb.
Şirkətin açıqlamasına görə yeni Toyota Prius modeli sadəcə 2 versiyada sadə hibrid (HEV) və şarj edilə bilən hibrid(PHEV) versiyalarda təklif olunacaq. Baza hibrid modeli əvvəlki modeldə olduğu kimi 1.8 litrlik benzin mühərriki və elektrik mühərriki ilə təchiz olunub. Bu modeldə mühərriklərin ümumi hasilatı 193 at gücüdür. Bu model 100 km/saat sürətinə sadəcə 7.5 saniyəyə sürətlənə bilir. PHEV variantı isə Dynamic Force ailəsindən olan 2.0 litrlik 4 silindirli atmosfer mühərriki və elektrik mühərriki təchiz olunub. Mühərriklərin ümumi hasilatı 223 at gücüdür. Bu model 100 km/saat sürətinə sadəcə 6.7 saniyəyə sürətlənə bilir. Həmçinin yeni modeldə Litium-ion batareyasının tutumu 16.3 kVatts-a qədər artırıldığı üçün onun yürüş məsafəsi təxminən 50% artaraq 90 km olub. Beləliklə, avtomobil sadəcə elektrik mühərriki ilə 90 km məsafə gedə bilər.
Şirkət yeni Toyota Prius modelininin yeni modelini panorama dama quraşdırılan günəş paneli ilə də təklif edir. Şirkətin iddiasına görə günəş paneli ilə təchiz olunmuş avtomobillər bir ildə 1250 kilometrlik “pulsuz” yürüyüşü təmin edir. Yeni modelin kütləvi nümayişi sabah Los Anceles şəhərində keçiriləcək. Kütləvi nümayişdən əvvəl, avtomobilin canlı görüntüləri ilə bu məqaləmizdən tanış ola bilərsiniz. Sadə hibrid modellərinin qış aylarında, PHEV hibrid modellərinin isə 2023-cü ilin yazında bazara çıxarılması gözlənilir.
