Son dövlərdə ortaya çıxan avtomobillərdə yəqin ki, hər kəs interyerdəki yeniliklərə şahid olub. Məhz avtomobil istehsalçıları hesab edirlər ki, yeni texnologiya və ya başqa sözlə desək əlavə displeylər alıcıların diqqətini cəlb edir. Lakin araşdırma onu göstərir ki, avtomobillərdə əlavə ekranlara maraq çox aşağıdır. Ümumiyyətlə biz 5-6 il əvvələ qayıtsaq görərik ki, avtomobillər konkret eyni ölçüdə displeyə sahibdir. Lakin daha sonra elektromobillərin həyatımıza daxil olması ilə bir çox yeni avtomobil istehsalçısı da ortaya çıxdı. Təbii ki, onların hər biri özünəməxsus interyer hazırlamaq üçün əlavə displeylərə və daha çox texnologiyaya üstünlük verdi.
AutoPacific tərəfindən həyata keçirilən “Gələcəyin xüsusiyyətlərinə tələb” araşdırması çərçivəsində məlum olub ki, əlavə ekranlara maraq gözləniləndən çox aşağıdır. Belə ki, yeni avtomobil almaq istəyən 700 nəfərin marağını ölçmək üçün CES 2024 sərgisində nümayiş olunan üç texnologiya araşdırılıb. Sərnişin tərəfindəki məlumat-əyləncə ekranlarını, məlumat-əyləncə ekranından məhsul almaq imkanını və avtomobilin kuzovunun xarici ekranlarını araşdıran şirkət müştərilərin dörddə birindən azının bu texnologiyalarla maraqlandığını aşkar edib.
Ümumiyyətlə araşdırma nəticəsində araşdırılan 3 texnologiyadan ən populyarı sərnişinlər üçün nəzərdə tutulan məlumat-əyləncə ekranı olub. Araşdırmada iştirak edənlərin sadəcə 21%-i bu ekranları gələcəkdə avtomobillərdə görmək istədiyini bildirib. Yeni premium avtomobillərdə getdikcə daha çox rast gəlinən sərnişin multimediası az da olsa maraq cəlb edib. Bununla belə, müştərilərin 79%-i avtomobilinin qiymətini 1000 dollar artırsa, bu xüsusiyyətlə maraqlanmayacaqlarını açıq şəkildə bildirib.
