ABŞ prezidenti Joseph Biden-in hazırkı administrasiyasının noyabr seçkilərinə qədər mümkün qədər çox qanunu təsdiqləmək istəyi başa düşülən hesab olunsa da, onların xarakteri aktiv sürücüyə yardım sistemləri bazarının bəzi iştirakçılarını narahat edə bilər. Belə ki, ABŞ yeni qərarı ilə Çin və Rus mənşəli avtomobillərə proqram və avadanlıqların istifadəsini qadağan edə bilər.
Bloomberg-in məlumatına görə, söhbət təkcə avtopilot sistemləri ilə bağlı deyil, həm də məlumatların ötürülməsi üçün istifadə olunan proqram və ya texniki vasitələrin qadağan edilməsindən gedir. ABŞ-ın bu qərarı proqram təminatına aid olsa da avadanlıqlar da bundan təsir görür. Ümumiyyətlə, qərarın daha çox Çin tərtibatçılara təsir etməsi gözlənilir. Əslində bu qadağa heç də anidən verilməyib, çünki bu ilin martında ABŞ-da avtonom avtomobillər üçün Çin proqram təminatı ilə bağlı araşdırma başladılıb. Bloomberg-in izah etdiyi kimi, ən yeni qanunvericilik təşəbbüsü bu araşdırmanın nəticələrinə əsaslanır. Məlumata görə, ABŞ rəsmiləri nəqliyyat vasitələrinin idarə edilməsinə uzaqdan müdaxilənin mümkünlüyündən və ya onlar vasitəsilə məlumat toplamaq imkanından narahatdırlar.
Çin avtomobili idarəetmə tərəfində minimal avtomatlaşdırılmış olsa belə, internet imkanları olan Çin məlumat-əyləncə sistemindən istifadə etdiyi üçün ABŞ bazarından qadağan edilə bilər. Xatırladaq ki, may ayında ABŞ hakimiyyəti Çindən gətirilən elektromobillərə 100 faizlik vergi tətbiq etmək qərarına gəlmişdi. Yeni məhdudiyyətlər Çinli avtomobil istehsalçılarının ABŞ bazarında uğur qazanmaq şansını daha da azaldıb. Yeni təşəbbüsün həmçinin ABŞ avtomobil istehsalçılarının Çin mənşəli elektron sistemlərdən istifadəsini hədəf alacağı gözlənilir. Qadağa bir neçə mərhələdə həyata keçiriləcək və qaydalar 30 günlük ictimai rəydən sonra gələn ilin yanvar ayından qüvvəyə minəcək. Amerika avtomobil sənayesinin nümayəndələri bildiriblər ki, komponent əsasında dəyişiklik dərhal baş verməyəcək və müəyyən vaxt tələb edəcək.
