Avtomobil dünyasında bir dövrün sonunun şahidi oluruq. Son 10 ildə əl ilə ötürülmə seçimi təklif edən modellərin sayı 66% azalsa da, 2026-cı il etibarı ilə 8 əsas avtomobil istehsalçısı artıq heç bir modelinə “mexanika” daxil etməyəcək. CarGurus tərəfindən aparılan araşdırma bu məsələ ilə bağlı konkret faktlar ortaya çıxarıb.
Məlumatlara görə, ən populyar 30 istehsalçı tərəfindən təklif olunan 292 modeldən yalnız 67-si əl ilə ötürülmə seçiminə malikdir. Bu o deməkdir ki, yeni avtomobil bazarındakı modellərin 23%-dən azı üç pedallı idarəetmə təcrübəsi təklif edir. 2016-cı ildə bazarda 197 mexaniki model olsa da, bu rəqəm kəskin şəkildə 2025-ci ildə 82-yə, 2026-cı ildə isə 67-yə düşüb. Bunun əksinə olaraq, yalnız avtomatik transmissiya ilə satılan modellərin sayı 225-ə yüksəlib. Bu il Fiat və Honda mexaniki transmissiya istehsalını tamamilə dayandıran brendlər sırasına qoşulublar. Tesla avtomobilləri mahiyyət etibarilə elektrik olduğundan, onlara heç vaxt ənənəvi sürət qutusu və ya muftaya ehtiyac olmayıb. İndi yalnız avtomatik transmissiyalı avtomobillər istehsal edən brendlərin siyahısı:
- Fiat
- Honda
- Land Rover
- Lexus
- Mercedes-Benz
- MINI
- Tesla
- Volvo
Mütəxəssislərin fikrincə, elektrikləşdirmə və hibridləşmə prosesləri mexaniki transmissiyaların sonunu sürətləndirir. Daxili yanma mühərrikli avtomobillərin satışına qoyulan qadağalarla, mexaniki transmissiyalı avtomobillərin 2030-cu ilə qədər yeni avtomobil bazarından tamamilə çıxarıla biləcəyi proqnozlaşdırılır. SUV modellərinə olan güclü maraq və premium avtomobil seqmentindəki dəyişikliklər də bu prosesi tetikleyen digər amillər arasındadır.
