Mediatek şirkəti orta-üst seqment cihazlarda istifadə üçün nəzərdə tutulmuş, Snapdragon 778G çipsetinin rəqibi olaraq görülən Dimensity 1080 çipsetini təqdim edib. Dimensity 920 çipseti üzərinə müəyyən təkmilləşdirmələr gətirən yeni çipset hansı texniki xüsusiyyətlərə sahibdir, gəlin yaxından nəzər salaq.
Belə ki, Dimensity 1080 çipseti elə Dimensity 920 kimi TSMC-nin 6nm texnoloji prosesi üzərinə istehsal edilir. Dimensity 920 çipseti 2 ədəd 2.5GHz tezlikli Cortex-A78 nüvəsinə və 6 ədəd 2.0GHz tezlikli Cortex-A55 nüvəsinə sahib idi. Dimensity 1080 çipsetində edilən yüksəltmə 2 ədəd Cortex-A78 nüvəsinin tezliyini 2.5GHz-dən 2.6GHz-ə çıxarır və Cortex-A55 nüvəsinin tezliyi isə sabit qalır. Nüvə arxitekturasından əlavə, yeni çipsetdəki ARM Mali-G68 MC4 qrafik çipi də Dimensity 920 çipseti ilə müqayisədə dəyişdirilməyib.
Nəticədə performans cəhətdən ciddi bir dəyişiklik meydana gəlməyib. Şirkətin əsas məqsədi Dimensity 1080 ilə görüntü emalı çipini təkmilləşdirmək və 200MP kamera dəstəyi gətirməkdir. Dimensity 920 çipsetindəki köhnə Imagiq sensoru 108MP-ə qədər kamera sensorlarının işlədilməsinə imkan verirdi. Digər bir tərəfdən yeni görüntü emalı çipi 4K keyfiyyətdə HDR videoların qeydə alınmasını dəstəkləyəcək. Lakin hələ də 4K keyfiyyətdə maksimum 30FPS video qeydə alma bacarığına malik olduğunu da vurğulamaq lazımdır.
Yenilənmiş 6GHz 5G bağlantısı, VoNR dəstəyi, Wi-Fi 6, Bluetooth 5.2 kimi detallara sahibdirlər. FHD+ təsvir ölçülü 120Hz tezlikli ekran paneli, bu prosessorlarla təchiz edilmiş smartfonlarda işlədilə bilər. Bu çipsetlə təchiz edilmiş ilk smartfon qarşıdakı həftələrdə Xiaomi tərəfindən təqdim ediləcək. Həmin modelin isə Redmi Note 12 seriyası daxilində olması nəzərdə tutulub.
