Son zamanlar bir çox şəxsin gözündə sağlamlıq problemləri müşahidə olunur. Digər bir tərəfdən ekrandan gələn mavi işığın qarşısını almaq üçün antiblik eynəklərin istifadəsi artır. Eynəklər bizim üçün nə qədər vacib olsa da aparılan tədqiqatlara görə yazıların eynəkdəki əksi bəziləri üçün yeni təhlükəsizlik boşluğu yaradıb. Xüsusilə COVID-19 pandemiyası sonrası onlayn tədbirlərin artması ilə məlumatların eynəkdəki əksini oxuya bilən alqoritmlər daha çox diqqət mərkəzində olub. Bu barədə açıqlama ABŞ-nin “Michigan” və Çinin “Zhejiang” universistetlərinin birgə apardığı tədqiqatlar sonrası verilib. Optik kiber-hücum deyə adlandıra biləcəyimiz bu faktın detallarına görə xüsusi alqoritmlər hesabına eynəkdəki əks vasitəsilə məlumatların 75-95 faizlik hissəsinin oğurlanması mümkündür.
Aşağı keyfiyyətli 720p kamera ilə yazıların eynəkdəki əksi təqribi 75% dəqiqliklə oxunub
20 müxtəlif şəxs üzərində aparılan testlərdə aşağı keyfiyyətli 720p kameralar ilə yazıların eynəkdəki əksi analiz edilib. Nəticədə 10 mm-ə qədər kiçilən elementlərin 75%-dən çox dəqiqliklə yenidən yaratmaq mümkün olub. Daha keyfiyyətli 4K kameraların yüksək detal səviyyəsi isə bir çox mətnin ən xırda dəqiqliklə belə başdan yaradılmasına şərait yaradır. Hətta xüsusi maşın öyrənməsi ilə işləyən alqoritmlər olmasa belə əks olunan görüntüdən məlumatların çıxarılması mümkün olur.
Qeyd edilir ki, bu tip optik kiber-hücum xüsusilə video konfranslarında məlumatların oğurlanması üçün istifadəyə uyğundur. Zoom tətbiqinin bu hücumdan qorunmaq üçün eynəkdəki və ya arxa plandakı əksi minimuma endirən xüsusi bir video filterinə sahib olduğu bildirir. Lakin Google Meet və digər aktiv istifadə edilən platformalarda belə bir filter xüsusiyyəti mövcud deyil. Onlayn konfrans, görüş keçirmək üçün hazırlanmış tətbiqlərə şirkətlərin müəyyən bir filter funksiyası əlavə etməsi gözlənilir. Lakin mütəxəssislər github üzərindən canlı videolarda eynəkdəki əksi bulanıqlaşdıran proqram təminatı paylaşıblar. İşi ilə əlaqədar optik kiber-hücumdan şübhələnən istifadəçilər həmin proqram təminatından yararlana bilərlər.
