Ötən həftə partlayıb ölümə səbəb olan Redmi 6A modelinin ardıyca, Xiaomi artıq yeni modelləri üçün hazırlıqlar görür. Belə ki, orta seqment Redmi seriyasına əlavə olunacaq Redmi Note 11 Pro 2023 və Redmi Note 12 seriyası ilə bağlı bəzi detallar sızdırılıb. İlk olaraq ötən il çıxarılmış birinci AMOLED ekranlı Redmi Note seriyası smartfon olan və Redmi Note seriyasının ən güclü nümayəndəsi hesab edilən Redmi Note 10 Pro modelini xatırlamağınızı istərdik. “K6” kod adına sahib Redmi Note 10 Pro modelinə uyğun gələn “K6A” kod adlı smartfon ötən həftə IMEI verilənlər bazasına əlavə edilib. “K6A” model nömrəli cihaz isə Redmi Note 11 Pro 2023 olaraq adlandırılıb. Yəni böyük bir ehtimalla ötən il çıxarılmış Redmi Note 10 Pro modelinin tamamilə yeni adla təkrar brendləşdirilmə mərhələsində olduğu bildirilir. Əksər hallarda təkrar brendləşdirilmiş Xiaomi modellərində texniki dəyişiklik edilmədiyindən, Redmi Note 11 Pro 2023 modelində hansısa fərqlilik olacağı gözlənilmir.
Redmi Note 12 seriyası barədə detallar isə tanınmış insayder DigitalChatStation tərəfindən paylaşılıb. Qeyd edilənə görə Redmi Note 11 seriyası ilə müqayisədə gövdə dizaynı cəhətdən ciddi bir dəyişiklik olmayacaq. Sərt kənarlara sahib gövdə quruluşu olduğu kimi sabit qalacaq, lakin kamera modulunda müəyyən dəyişikliklər ediləcək. İlk olaraq 108MP kamera yerini 50MP kamera ilə (böyük bir ehtimalla Sony IMX 7XX seriyası) əvəzləyəcək. Anladığımız qədərilə şirkət 108MP trendindən yavş-yavaş uzaqlaşacaq. Lakin 8MP ultra-geniş bucaqlı və 2MP makro kameralar yerində qalacaq.
Seriya daxilində isə bir çox modelin 120 Vt sürətli şarj dəstəyi alacağı bildirilir. Əlavə olaraq adapter ən azından Çin bazarında qutuya yerləşdiriləcək. Avropa bazarında bu vəziyyətin necə dəyişəcəyi hələlik müəmmalı olaraq qalır. Qlobal bazar üçün nəzərdə tutulmuş Redmi Note 12 Pro modelinin öz gücünü Snapdragon 6 Gen 1 çipsetindən alacağını təxmin edirik. Lakin cihazlarla bağlı detallar hələlik tam ətraflı deyil. Redmi Note 12 seriyasının Çin debütünün növbəti ay baş tutacağı gözlənilir.
