Google Pixel 7 və Pixel Watch ağıllı saat modellərinin təqdimat tarixi rəsmi olaraq açıqlanıb. Bu isə Apple şirkətinin ötən gün keçirdiyi iPhone 14 təqdimatı ilə eylə eyni gündə təqdimat tarixi açıqlama bir növ “sataşma” sayıla bilər. Hətta Google şirkətinin Tensor çipsetlərinin mühəndisliyində önəmli paya sahib Samsung şirkəti də sosial şəbəkələrdə dayanmadan Apple şirkətinə “sataşmaqla” məşğuldur. Həmin paylaşımlarla tvit formasında xəbərin sonundan baxa bilərsiniz.
Təbii ki, tədbirin diqqət mərkəzində Google şirkətinin Pixel 7 və Pixel Pro smartfonları olacaq. Bunlarla yanaşı axtarış nəhəngi ilk Pixel Watch ağıllı saat modelini də tanıdacaq. Cihazların ilk anonsu bu il keçirilmiş I/O tədbirində baş tutmuşdur.
Pixel 7 və Pixel Watch haqqında
Google şirkətinin Pixel 7 modelinin dizaynı artıq uzun müddətdir ki, hamıya məlumdur. Şirkətin onlayn-mağazasının səhifələrinin birində yeni smartfonların əsas texniki göstəriciləri haqqında məlumatlar qeyd olunub. Hər iki cihazın əsasında, Google şirkətinin Samsung əməkdaşlığında hazırladığı, yeni nəsil Tensor G2 çipsetləri dayanacaq.
Tam ətraflı və dəqiq texniki göstəriciləri hələ ki, məlum deyil. Lakin ötən gün internetdə Pixel 7 Pro modelinin qutu açılış videosu belə sızdırılmışdı. Həmin videoda smartfonun realda necə görünəcəyi aydın başa düşülür. Cihazın arxa panelində aluminium materialından kamera bloku Google Pixel 6 seriyasındakına bənzər dizayn alıb. Sadə və Pro versiyası kamera sensorlarına və sayına görə fərqlilik daşıyacaq. Daha əvvəl may ayında Pixel 7 Pro modelinin prototipi e-bay və Facebook Marketplace onlayn mağazasında satışa çıxarılmışdır.
Pixel Watch ağıllı saat modeli isə Google şirkətinin son illərdə ən gözlənilən cihazlarından biridir. Bazarda olan Samsung Galaxy Watch 5 və tanıdılacaq Apple Watch 8 modelləri ilə rəqabət aparacaq. Saatın dizaynı uzun müddətdir ki, sızdırılmış məlumatların hesabına məlumdur. Tədbir 6 oktyabr tarixində onlayn şəkildə keçiriləcək. Şayiələrə görə 6 oktyabr tarixində keçiriləcək tədbirdə, Google şirkətinin ağıllı eynək modeli haqqında həmçinin məlumat veriləcək. Bu eynəyin əsas özəlliklərindən biri, real zamanda tərcümə etmə funksiyasıdır.
