Azərbaycanda keçirilən Teknofest Azərbaycan tədbiri yerli startap ekosisteminə töhfə verməyə davam edir. Belə ki, Teknofest Azərbaycan festivalında ən böyük regional startap sammiti olan Take Off Baku beynəlxalq sammiti baş tutmuşdu. Azərbaycanda keçirilən bu sammit üçün 32 ölkədən 287 startap iştirak üçün qeydiyyatdan keçsə də, sadəcə 50 startap iştirak hüququ qazanmışdır. Yerli və xarici 25 münsif tərəfindən seçilən startaplar isə 8 müxtəlif ölkədən dəvət edilib. Bu 50 startap arasından 25-i Take Off Baku sammitində finala qalmağı bacarmışdır ki, həmin startaplardan da 14-ü Azərbaycanın yerli startapları olub. Yerdə qalan 11 startapdan 3 ədədi ABŞ, 4 ədədi Türkiyə, digərləri Pakistan, Argentina, Estoniya və Misirdən gəlib.
Finaldakı bu 14 Azərbaycanlı startapdan isə 6 ədədi Türkiyədə akselerasiya proqramına dəvət alıblar. Take Off Baku sammiti çərçivəsində uğur qazanmış E-Point, Healwith, Safavy və.s olmaqla ümumilikdə 6 startap Türkiye Teknoloji Takım Vakfının dəvəti ilə İstanbulda keçirilən akselerasiya proqramında iştirak ediblər. Gebze, Kocaeli-də yerləşən Bilişim Vadisinə yollanan yerli startaplar investorlara məhsul təqdimatı, rəqəmsal marketinq, insan resursları, sərmaye alma strategiyaları, patentlərin əldə olunması kimi geniş mövzularda bacarıqlarını təkmilləşdiriblər.
Akselerasiya proqramında iştirak edən həmyerlilərimiz verdikləri müsahibələrdə, orda qazandıqları təcrübələrlə yerli startaplara töhfə verməyə çalışacaqlarını, həmin təcrübələri ölkəmizə gətirmək istədiklərini bildiriblər. Qeyd edək ki, qlobal miqyasda səs gətirən Take Off Baku startap sammitinin Azərbaycanda keçirilməsində İnnovasiya və Rəqəmsal İnkişaf Agentliyinin böyük rolu və təşkilatçılığı olmuşdur.
