Çinin nəhəng Xiaomi brendi növbəti flaqman modellərinin təqdimatına hazırlaşır. Belə ki, təqdimatdan bir neçə ay əvvəl Xiaomi 13 və Xiaomi 13 Pro ilə bağlı yeniliklər yavaş-yavaş internetə sızdırılmağa başlanıb. Hər il olduğu kimi insayderlər qabaqcadan smartfonların bəzi ilkin texniki xüsusiyyətlərini bölüşüblər. Xiaomi 13 seriyasında Xiaomi 12 seriyası ilə müqayisədə əhəmiyyətli fərqlərin meydana gələcəyi bildirilir. Xüsusilə də sadə Xiaomi 13 modeli üzərində ciddi dəyişikliklər ediləcək.
Xiaomi 13 modeli qıvrımları olmayan, minimum çərçivəli düz ekran paneli alacaq
İstehsalçının məqsədi sadə Xiaomi 13 modelində Galaxy S22+ və ya Realme GT 2 Master Explorer Edition kimi 2.5D 120Hz OLED düz ekran (qıvrımları içə doğru qatlanıb, xaricdən kənar çərçivələrin görünşünü azaldan texnologiya) paneli istifadə etməkdir. Həmin modellərdə olduğu kimi heç bir qıvrımı olmayan kompakt ölçülü 6.36 düymlük ekrana sahib smartfon, çox nazik ekran ekran çərçivələrini özündə birləşdirəcək. Hətta ehtimal edilir ki, ekran paneli 6.28 düymlük Xiaomi 12 modelindən biraz böyük olsa da fiziki ölçüləri dəyişməyəcək. Yəni cihaz eyni ölçülü gövdədə daha geniş ekran vəd edəcək.
Xiaomi 13 Pro modeli Xiaomi 12 Pro modelindəki ilə bənzər 6.7 düymlük 120Hz 2K AMOLED Samsung E6 ekran paneli işlədəcək. Ehtimallara görə bu ekran dörd tərəfdən qıvrımlara malik olacaq. Mərkəzdəki selfi kamerasında isə hər hansı bir dəyişiklik edilməyəcək. Yəni şirkət ekran altı kameralara keçid etməyi planlaşdırmır.
Hər iki smartfon öz gücünü Snapdragon 8 Gen 2 çipsetindən alacaq. Xiaomi 13 Pro modelində şirkətin hazırladığı yeni nəsil şarj texnologiyasının 100 Vt sürətli şarj dəstəkləyəcəyi bildirilir. Yeni şarj texnologiyası və xüsusi Surge P2 çipi batareyanı 100 Vt ilə rəqiblərindən daha sürətli doldurmağa imkan verəcək. Naqilsiz şarj 50 Vt, tərs şarj isə həmişəki kimi 10 Vt təşkil edəcək. Xiaomi 13 modeli böyük bir ehtimalla 4500 mAs (67 Vt), Xiaomi 13 Pro modeli 5000 mAs batareyaya sahib olacaq.
Kamera parametrləri cəhətdən dəqiq bir informasiya mövcud deyil. Lakin Xiaomi 13 Pro modelinin Xiaomi 12S Ultra modeli qədər güclü texniki xüsusiyyətlərə sahib olmayacağı deyilir. Yaxın həftələrdə cihazlarla bağlı daha ətraflı məlumat MIUI qaynaq kodları vasitəsilə ortaya çıxacaqdır.
