Apple şirkətinə məxsus MacOS əməliyyat sisteminin proqram mağazasında Scam proqramların sayı artıb. The Verge bildirir ki, Scam proqramlar istifadəçilərə Pop-Up (açılan-bağlanan) pəncərələr göstərərək pullu abunəlik xidmətləri təklif edir. Nəticədə istifadəçilər də bundan narahat olurlar.
Proqram təminatlarının yoxlanışlarında ən qatı və təhlükəsiz olan Apple şirkəti bu aralar bəzi problemlərlə üzləşir. MacOS sistemlərində Scam proqramların sayının artması şirkəti çətin vəziyyətdə qoyub. Aparılan araşdırmalar göstərib ki, Apple-ın əməliyyat sisteminin proqram mağazasındakı Scam proqramlar istifadəçiyə zorla pullu xidmətləri təklif edir. Daha pisi isə ondadır ki, əgər istifadəçi pullu xidmətə abunə olmazsa bu proqramların bildirişləri getmir. Bu da istifadəçiləri ciddi mənada narahat edir. Bir digər məsələ isə bu proqramların Apple-ın ciddi olan yoxlanışlarından necə yayınmasıdır.
MacOS Scam proqramları Apple-ın yoxlanışlarından qaçıb
Şirkətin MacOS ƏS-də olan Scam proqramlarından biri olan My Metronome istifadəçilərə satın alma pəncərəsi göstərir. İstifadəçi pullu xidməti satın almazsa bu pəncərədən çıxa bilir. Belə halda isə istifadəçi satın alma pəncərəsini zorla bağlamalıdır. Bu proqramlardan bir digəri də Music Paradise Player-dir. Lakin bu proqramın tərtibatçısı insaflı davranaraq satın alma pəncərəsinin istifadəçi tərəfindən bağlanılmasını mümkün edib. Apple Store qaydalarına əsasən bu proqramlar normalda bloklanmalı idi, lakin necə olubsa Apple-ın yoxlanışlarından yayına biliblər. Əlavə olaraq MacOS kimi iOS sistemində də bu tip tətbiqlərin artdığı bildirilir.
Ümumiyyətlə Apple ekosistemi, xüsusilə MacOS əməliyyat sistemi Windows-a nəzərən daha təhlükəsiz olması ilə bilinir. Microsoft şirkəti Windows üçün olan bütün proqramları yoxlanışdan keçirmir. Və keçirə də bilməz. Çünki Windows açıq bir sistemdir. Amma Apple əməliyyat sistemi bununla müqayisədə qapalı sistem hesab olunur və tətbiqlərin hamısı Apple tərəfindən müəyyən yoxlanışlardan keçir. Bu səbəbdən MacOS cihazlarında Scam proqramların yayılması istifadəçiləri həm təəccübləndirir, həm də Apple-a qarşı şübhə içinə salır. Əlavə olaraq, son illər ərzində Apple ekosisteminin daha da genişləməsi və istifadəçi sayının artması səbəbilə xakerlərin əsas hədəf nöqtələrindən biri halına gəlib. Bu səbəblə unutmayın ki, hər zaman təhlükəsiz qala bilən heç bir sistem mövcud deyil.
