Beləliklə, Samsung brendinin flaqman seriyalarından olan Galaxy Z Fold seriyasının yeni nümayəndəsi Galaxy Z Fold 6 barədə yeni məlumatlar ortaya çıxıb. Yeni flaqman qatlanan smartfon tamamilə yeni dizaynla gələcək. Hətta bu smartfon Samsung brendinin ən nazik qatlanan smartfonu olaraq tarixə düşəcək.
Ümumiyyətlə Galaxy S24 seriyasından sonra bütün gözlər Samsung-un qatlanan smartfon modelləri olan Galaxy Z Fold 6 və Galaxy Z Flip 6-ya çevrilib. Yeni qatlanan smartfonların bu ilin ikinci yarısında təqdim ediləcəyi gözlənilsə də, artıq onlar barədə ilkin məlumatlar ortaya çıxıb. Qeyd edək ki, Z Fold 5-də dizayn dəyişikliyi olmadığı üçün Z Fold 6-nın tamamilə yeni dizayn ilə gəlməsi gözlənilir. O cümlədən yeni qatlalan smartfon modelinin sələfindən daha yüngül və daha incə olacağı da gözlənilir. Hətta bu smartfonun 11 mm qalınlıq ilə cənubi koreyalı texnologiya nəhənginin indiyə qədərki ən nazik qatlanan smartfonu olacağı gözlənilir.
Yeni qatlanan smartfon Samsung Galaxy S24 Ultra modeli kimi kəskin xətlərə və titan quruluşa sahib olacaq. O cümlədən smartfon yenə də IP68 sertifikatına sahib olacaq. İddialara görə smartfonun xarici ekranı 6.4 düym olacaq. Xatırladaq ki, bu ekrab Z Fold 5 modelində 6.2 düym idi. Xarici ekranın 20:9 aspekt nisbətinə, daxili ekranın isə 1,08:1 nisbətinə sahib olacağı deyilir. Bununla belə smartfonun əhəmiyyətli bir çatışmazlığı olacaq ki, o S Pen qələm yuvasına sahib olmayacaq. Kamera tərəfində Galaxy Z Fold 6-nın 50MP əsas kamera, 12MP ultra geniş kamera və 10MP telefoto kameradan ibarət kamera quruluşu olduğu bildirilir. Smartfonun Snapdragon 8 Gen 3 ilə təchiz ediləcəyi və 4600 mAs batareya həcminə sahib olacağı da iddialar arasındadır.
