Böyük bir ehtimalla Çin və Tayvan arasında baş verənlər səbəbi ilə bu gün OnePlus 10T modelinin Çindəki qarşılığı OnePlus Ace Pro təqdimatı təxirə salındı. Hətta dünyanın ilk 200MP kamerasına sahib Motorola X30 Pro modeli də ötən gün təqdim edilməli olarkən, anonsu naməlum vaxta qədər ləğv edildi. Lakin xoşbəxtlikdən bu gün qlobal bazar üçün OnePlus 10T heç bir çətinliklə qarşılaşmadı və smartfon nəhayət rəsmiləşərək qarşımıza çıxarıldı. Beləliklə, OnePlus brendinin Snapdragon 8+ Gen 1 çipsetinə sahib ilk modelinə gəlin bütün detalları ilə birlikdə nəzər salaq.
OnePlus 10T modeli nə vəd edir?
İstehsalçı 2 ildən sonra yenidən “T” seriyasını yenidən başlatmaq qərarı alıb. Daha doğrusu böyük bir ehtimalla bu seriyanı brendin “yeni” sahibi Oppo geri qaytarıb. Çünki, indiyə qədər sonuncu OnePlus 8T seriyasına qədər bu “T” xətti brendin ən üst səviyyə cihazları üçün yüksəltmə mənası daşıyırdı. OnePlus 10T modeli isə OnePlus 10 Pro ilə müqayisədə Snapdragon 8+ Gen 1 çipsetini nəzərə almasaq daha ucuz və aşağı pillədə yerləşən model hesab edilir.
Smartfonun dizaynından bəhs etsək ilk olaraq gövdəsinin plastik materialdan hazırlandığını qeyd etmək istərdik. Arxa tərəfin dizaynı OnePlus 10 Pro modelini xatırladır. Lakin kamera moduluna diqqətlə baxdıqda, Hasselblad əməkdaşlığından bu modeldə imtina edildiyi görülür. Əməkdaşlıqdan ən azından bu model üçün imtina edilməsindən əlavə, kamera parametrləri cəhətdən aşağıda bəhs etdiyimiz kimi texniki cəhətdən də bəzi zəiflətmələr mövcuddur.
Ön tərəfdə OnePlus 10 Pro ilə əsas fərq düz ekran panelinin işlədilməsidir. Yəni OnePlus 10 Pro kimi ekranın kənarlarında qıvrımlar yoxdur, üstəlik ekran paneli 2K təsvir ölçüsünə malik deyil. Amma qeyd etməliyik ki, ekranın kənar çərçivələri həqiqətən minimalist alınıb. Gözə xoş görünür. OnePlus smartfonlarına xas olan və iPhone modellərindəkinə bənzəyən sürüşdürməli səs düyməsi bu modeldə mövcud deyil. Oppo inteqrasiyasından sonra bu xüsusiyyət deyəsən, tamamilə yığışdırılıb.
Smartfonun texniki xüsusiyyətləri necədir?
Cihaz öz gücünü Snapdragon 8+ Gen 1 çipsetindən alır. İstehsalçı bu modeldə xüsusilə performansa önəm verib. Belə ki, cihaza 2 kanallı yüksək sürətli UFS 3.1 yaddaş həlli quraşdırılıb. 16GB-a qədər ala biləcəyiniz LPDDR5 operativ yaddaşın qarşıdakı 4-6 il boyunca 35-ə qədər tətbiqi arxa planda açıq saxlamağı bacaracağı bildirilir. Hər təqdimatda olduğu kimi burda da buxar qazanı tipli soyutma sistemi quraşdırıldığı deyilir. 37038.8mm² ölçülü buxar qazanı brendin iddia etdiyinə görə 4800 mAs həcmli batareyanı 150 Vt sürətli şarjla doldurduqda belə temperaturu stabil saxlamağa kömək edəcək. Qeyd edək ki, qutudan çıxan SuperVOOC adapter də 160 Vt gücə malikdir. Bəlkə də bir çoxlarınızın notbuku bu adapterlə rahatlıqla enerji ilə təmin oluna bilər.
Modelin ekranına keçid etsək 6.7 düymlük FHD+ təsvir ölçülü 120Hz tezlikli Fluid AMOLED ekran paneli görəcəyik. Sensor tezliyi texniki olaraq 360Hz olan və proqram təminatı vasitəsilə 720Hz-ə qədər yüksələn ekran Gorilla Glass 5 ilə qorunur. HDR10+, P3 rəng qamutu, 10 bit rəng dərinliyi və.s kimi keyfiyyət standartlarına sahibdir.
OnePlus 10T modelində Sony IMX766 50MP baş sensoru istifadə edilib. Daha yeni nəsil sensor olsa da OnePlus 10 Pro modelindəki IMX789 48MP ilə müqayisədə daha kiçik sensor ölçüsünə malikdir və obyektivi nisbətən zəiflədilmişdir. Dolayı olaraq kamera performansı nisbətən geri qala bilər. Yerdə qalan sensorlar isə 8MP F/2.2 ultra-geniş bucaqlı, 2MP makro sensorlarıdır. Yenə OnePlus 10 Pro ilə qarşılaşdırsaq telefoto sensoru mövcud deyil. Unutmadan qeyd edək ki, baş sensor OIS ilə gücləndirilib və 4k keyfiyyətdə 60FPS videolar qeydə almağı bacarır. Selfi kamerası isə 16MP təsvir ölçüsünə malik olub yalnız 1080P@30FPS video görüntülər qeydə ala bilər.
Smartfon “Stereo” səs ucaldanlara sahibdir. Android 12 üzərinə ColorOS əsaslı OxygenOS interfeysi ilə qutudan çıxır. İstehsalçı iki hüceyrəli batareya üçün 1600 dövrə qədər zəmanət verir. Anladığımız qədərilə yeni cihazın satış strategiyası uzun ömürlülük üzərinə qurulub.
OnePlus 10T modelinin qiyməti
- 8-128GB 649$
- 12-256GB 749$
