Xiaomi firması bazarda boşluq gördüyü bütün sektorlara sürətlə hücum edir. Məsələn, elə bir neçə həftə əvvəl sizinlə Xiaomi firmasının Redmi Note 9 ilə eyni Helio G85 çipsetinə sahib düyməli smartfonunu bölüşmüşdük. İndi isə növbədə Xiaomi firmasının qəribəliyi ilə fərqlənən Mijia ağıllı eynəyindədir. Belə ki, istifadə etsəniz hamının sizə qəribəliklə baxacağı qədər kobud dizayna malik bu ağıllı eynək 2 illik əməyin məhsuludur. Xiaomi firması ötən il bənzər bir ağıllı eynək təqdim etmişdi, amma seriya istehsalı üçün o qədər də uyğun deyildi.
Xiaomi Mijia ağıllı eynəyi 5 qat optik yaxınlaşdıran telefoto kamerasına malikdir
Xiaomi Mijia Glasses Camera modeli isə elə adı üstündə kamerası ilə fərqləndiyindən bu cür qalın dizayna sahib olması normal haldır. Xiaomi firması bu eynəyə smartfonlarında belə işlətmədiyi 8MP təsvir ölçülü telefoto kamerasını quraşdırıb. 5 qat optik, 15 qat rəqəmsal yaxınlaşdırma edə bilən telefoto kamerası hələ üstəlik OIS ilə də gücləndirilib. Əsas kamera isə 50MP təsvir ölçüsünə malikdir. Bu ağıllı eynək eyni zamanda sizin “təhlükəsizlik kameranızdır“. Çünki, eynəyi taxdığınız müddət ərzində kameralar aktiv olaraq 10 saniyədən bir silinən videolar qeydə alır. Əgər qarşınızda maraqlı və ya problem yaradacaq ani bir şey baş versə eynək həmin andakı görüntünü qeydə almış olur. 32GB yaddaşı 100 dəqiqəyə qədər video qeydlər almağınıza imkan verir.
Xiaomi Mijia modelinə Sony tərəfindən istehsal olunan 0.23 düymlük Mirco OLED ekran quraşdırılıb. Piksel sıxlığı 3281ppi təşkil edir. Maksimum parlaqlıq isə 1800 nitdir ki, gün işığı altında rahatlıqla ekranı görə bilərsiniz. Gözlərə zərərli olmadığını təsdiq edən TÜV Rheinland sertifikatına malikdir.
100 qram ağırlığındakı bu eynək öz gücünü 8 nüvəli Qualcomm çipsetindən alır. Eynək eyni zamanda artırılmış reallıq xüsusiyyətlərini də dəstəklədiyindən, baxdığınız görüntünü canlı olaraq tərcümə etməyiniz mümkündür. Hal-hazırda yalnız Çin-İngilis dilləri arasında canlı tərcümə funksiyaları işləyir. Lakin yeniləmələrlə digər dillərə də dəstəyin gətiriləcəyi gözlənilir.
İstehsalçı bu modelə 1020 mAs həcmli batareya quraşdırıb. 10 Vt maqnetik şarj ilə batareyanı təqribi 30 dəqiqəyə doldurmağı bacarır. Wi-Fi və Bluetooth 5.0 bağlantılarına dəstək mövcuddur.
Qiyməti
3-32GB 400$ (370$ ön sifarişlə alanlar üçün)
