Dünyanın ən böyük kriptovalyuta birjalarından biri olan Binance genişmiqyaslı kiberhücuma məruz qalıb. Şirkətin ilkin hesablamalarına görə, təhlükəsizlik insidentinin ümumi maliyyə təsiri təxminən 6,3 milyard dollar təşkil edir. Bu, kriptovalyuta sektorunun tarixində qeydə alınmış ən böyük kiberhücumlardan biri hesab olunur.
Hadisə oktyabrın 29-da blokçeyn şəbəkələrində qeyri-adi əməliyyatların aşkarlanması ilə gündəmə gəlib. Analitiklər Binance ilə əlaqəli kriptovalyuta pulqabılarından müxtəlif ünvanlara milyardlarla dollar dəyərində rəqəmsal aktivlərin köçürüldüyünü müəyyən ediblər.
İlkin məlumatlarda şübhəli köçürmələrin həcmi 2,7 milyard dollar qiymətləndirilsə də, sonrakı araşdırmalarda bu rəqəm 5,8 milyard dollara yüksəlib.
Oktyabrın 30-da Binance hadisə ilə bağlı rəsmi açıqlama yayaraq ümumi maliyyə təsirinin təxminən 6,3 milyard dollar olduğunu bildirib.
Şirkətin ilkin araşdırmasına əsasən, hücumun mənbəyi DevOps mühəndislərindən birinin ələ keçirilmiş noutbuku ola bilər. Ehtimala görə, hücumçular həmin kompüter vasitəsilə şirkətin xidmət konteynerlərindən birinə giriş əldə edərək icazəsiz vəsait çıxarılması əməliyyatları həyata keçiriblər.
Binance bildirib ki, indiyədək kriptovalyuta pulqabılarının məxfi açarlarının sızmasına dair sübut aşkarlanmayıb.
Bu məqam xüsusilə diqqət çəkir. Çünki kriptovalyuta hücumlarında aktivlərin oğurlanması çox vaxt məxfi açarların ələ keçirilməsi ilə əlaqələndirilir. Hazırkı insidentdə isə ilkin ehtimallar hücumçuların şirkətin daxili texniki infrastrukturundakı giriş imkanlarından istifadə etdiyini göstərir.
Hücumdan sonra müxtəlif blokçeyn şəbəkələrində böyük həcmli kriptovalyuta köçürmələri qeydə alınıb. Araşdırmalarda onlarla fərqli rəqəmsal aktivin şübhəli ünvanlara yönləndirildiyi bildirilir.
Bəzi əməliyyatların Tornado Cash kimi kriptovalyuta əməliyyatlarının izlənilməsini çətinləşdirən xidmətlərlə əlaqəli olduğu da müəyyən edilib.
Hadisəyə Tether və Circle şirkətləri də müdaxilə edib.
Tether hücumla əlaqəli təxminən 1,57 milyard dollar dəyərində USDT aktivini, Circle isə 823 milyon dollar həcmində USDC aktivini dondurub.
Binance-in son açıqlamasına əsasən, blokçeyn tərəfdaşları ilə əməkdaşlıq nəticəsində ümumilikdə təxminən 3 milyard dollar dəyərində aktivin hərəkəti məhdudlaşdırılıb.
Şirkət təhlükəsizlik tədbirləri çərçivəsində depozit və vəsait çıxarılması əməliyyatlarını müvəqqəti dayandırıb. Eyni zamanda hücumla əlaqəli ünvanların səlahiyyətləri ləğv edilib və hadisənin araşdırılmasına hüquq-mühafizə orqanları cəlb olunub.
Binance-in həmtəsisçisi və keçmiş rəhbəri Çanpen Çjao hadisənin kiberhücuma bənzədiyini bildirib. O, hazırda birjanın idarə edilməsində iştirak etmədiyini, lakin istifadəçilərin vəsaitlərinin tam qorunacağını gözlədiyini qeyd edib.
Binance də istifadəçilərin vəsaitlərinin təhlükəsiz olduğunu açıqlayıb. Şirkət hücum nəticəsində yaranan bütün itkilərin SAFU ehtiyat fondu və öz maliyyə vəsaitləri hesabına qarşılanacağını vəd edib.
Hadisə kriptovalyuta bazarına da təsirsiz ötüşməyib. Hücumla bağlı xəbərlərin yayılmasından sonra Bitcoin-in qiyməti 82 min dollar səviyyəsindən 79 min dollardan aşağı düşüb. Binance ekosisteminin BNB tokeni də dəyər itirib.
Əgər 6,3 milyard dollarlıq zərər təsdiqlənərsə, bu hadisə 2025-ci ildə Bybit birjasından təxminən 1,5 milyard dollar dəyərində kriptovalyutanın oğurlandığı hücumu da geridə qoyacaq.
Binance hadisənin texniki səbəbləri tam müəyyənləşdirildikdən sonra ətraflı hesabat dərc edəcəyini bildirib.
