Sentyabrın 25-də Azərbaycan Respublikasının Prezidenti İlham Əliyev Bakıda dünyanın ən nüfuzlu və irihəcmli investisiya şirkətlərinin rəhbər şəxslərini qəbul edərək, ölkənin qlobal maliyyə arxitekturasındakı mövqeyini daha da möhkəmləndirən mühüm danışıqlar aparıb. Dövlət başçısı idarə etdiyi 15,3 trilyon dollarlıq aktivlə dünyanın ən böyük investisiya nəhəngi olan “BlackRock”un törəmə qurumu “Global Infrastructure Partners”ın sədri və baş icraçı direktoru Adebayo Oqunlesi, 1 trilyon dollardan çox aktivi idarə edən “Brookfield Asset Management”in baş icraçı direktoru Konnor Teski və 613 milyard dollarlıq portfelə malik “Neuberger Berman”ın sədri və baş icraçı direktoru Corc Volker ilə görüşüb. Bu ardıcıl və strateji görüşlər Azərbaycan Dövlət Neft Fondunun beynəlxalq investisiya idarəediciləri ilə çoxşaxəli tərəfdaşlığını keyfiyyətcə yeni mərhələyə qaldırmaqla yanaşı, ölkəmizin regionun əsas maliyyə və infrastruktur habına çevrilmək xəttini nümayış etdirir.
Keçirilən danışıqlar təkcə beynəlxalq investorların Azərbaycana olan marağını deyil, həm də konkret layihələrə söykənən uzunmüddətli əməkdaşlıq mexanizmlərini əhatə edib. Müxtəlif illərdə qoyulmuş təməllər və cari ilin yanvarında Davos İqtisadi Forumu çərçivəsində əldə olunmuş razılaşmalar sentyabrın 25-də Bakıda keçirilən görüşlərin ana xəttini təşkil edib. Prezident İlham Əliyevin Adebayo Oqunlesi ilə görüşündə ARDNF, “BlackRock” və GIP arasında imzalanmış və 3-4 il ərzində GIP-nin infrastruktur fondlarına 1,5 milyard dollara qədər vəsaitin yatırılmasını nəzərdə tutan niyyət protokolunun icra dinamikası yüksək qiymətləndirilib. Tərəflər Azərbaycanda rəqəmsallaşma, süni intellekt və bulud texnologiyalarına olan regional tələbatı ödəyəcək data mərkəzlərinin, eləcə də nəqliyyat və hava limanı infrastrukturlarının inkişafı imkanlarını nəzərdən keçiriblər. Bu tərəfdaşlıq artıq praktiki nəticələr verir; ARDNF GIP ilə birgə İtaliyanın “Italo” dəmir yolu operatoruna 34,5 milyon avro və Londonun Qatvik hava limanına 50 milyon funt sterlinq həcmində investisiya yatırıb.
“BlackRock” və GIP ilə əməkdaşlıq həm də Azərbaycanın Mərkəzi Asiya regionu ilə dərinləşən inteqrasiyası baxımından strateji əhəmiyyət kəsb edir. Azərbaycanın Mərkəzi Asiya Dövlət Başçılarının Məşvərət Görüşlərinə “C6” formatında tamhüquqlu qoşulması qlobal investorlar üçün layihələrin miqyasını genişləndirir. “BlackRock” və GIP-in Fars körfəzi və Mərkəzi Asiyanı əhatə edən 30 milyard dollarlıq yeni qlobal infrastruktur alyansı, həmçinin Qazaxıstan və Özbəkistandakı iri layihələri fonunda Azərbaycan təkcə ayrıca milli bazar kimi deyil, geniş regiona çıxışı təmin edən qlobal bağlantı mərkəzi kimi dəyərləndirilir.
Bu regional və texnoloji baxış “Brookfield Asset Management” və “Neuberger Berman” rəhbərləri ilə aparılan müzakirələrdə də öz əksini tapıb. “Brookfield”in baş icraçı direktoru Konnor Teski ilə görüşdə şirkətin 125 ildən artıq əməliyyat təcrübəsi, 308 mindən çox telekommunikasiya obyekti, 150 data mərkəzi və bərpa olunan enerji portfelinin imkanlarından yararlanmaqla dekarbonizasiya və rəqəmsallaşma sahəsində birgə addımların atılması vurğulanıb. Eyni zamanda, 1939-cu ildən fəaliyyət göstərən “Neuberger Berman”ın sədri Corc Volkerlə görüşdə ARDNF ilə 2015-ci ildən başlayan 10 illik uğurlu tərəfdaşlıq təcrübəsinə nəzər salınıb. Neft Fondunun özəl kapital, özəl borc və birgə investisiya alətləri çərçivəsində bu şirkətə ayırdığı 775 milyon dollarlıq portfelin uğurlu idarə olunması və gələcək genişlənmə perspektivləri yüksək qiymətləndirilib.
Yekun olaraq, sentyabrın 25-də baş tutan bu üç yüksəksəviyyəli qəbul Azərbaycanın qlobal kapitalı cəlb etmək, suveren fond vasitəsilə strateji investisiyalar həyata keçirmək və Cənubi Qafqazla Mərkəzi Asiyanı vahid iqtisadi və infrastruktur habında birləşdirmək istiqamətindəki uğurlu siyasətinin bariz təzahürüdür.
