Apple-ın yeni Watch Ultra 4 və Watch Series 12 ağıllı saatlarının bəzi istifadəçiləri cihazların gözlənilmədən sönüb yenidən başlamasından şikayət edirlər. Bildirilir ki, problem hətta ilkin quraşdırma zamanı təqdim olunan proqram yeniləməsi quraşdırıldıqdan sonra da davam edir.
İstifadəçi məlumatlarına görə, saat Siri ilə işləyərkən, ekran görünüşünü dəyişərkən, Xəritələr və App Store tətbiqlərini açarkən, zəng edərkən və ya məşq qeydə alarkən qəfil Apple loqosunu göstərərək yenidən başlayır. Bəzi hallarda problem cihaz istifadə olunmadığı vaxt da baş verir.
Paylaşılan diaqnostika qeydlərində sistemin çökməsini ifadə edən kernel panic və Neural Engine-in əməliyyatı vaxtında tamamlamaması ilə bağlı xəta qeydlərinin olduğu bildirilir. Bu məlumatlar problemin Neural Engine ilə əlaqəli ola biləcəyini göstərsə də, dəqiq səbəb hələ təsdiqlənməyib.
Şikayətlər həm watchOS 27.0 versiyasında, həm də ilkin quraşdırma zamanı yüklənən yeniləmədən sonra qeydə alınıb. Bəzi istifadəçilər saatı zavod parametrlərinə qaytarıb yenidən qursalar da, problemin aradan qalxmadığını bildirirlər. Watch Series 12 istifadəçilərindən biri isə dəyişdirilən yeni cihazda da eyni xəta ilə qarşılaşdığını qeyd edib.
Reddit və Apple-ın dəstək icmasında oxşar şikayətlər paylaşılıb. Bununla belə, problemin neçə cihazı əhatə etdiyi məlum deyil. Mənbədəki məlumata görə, Apple hələlik nasazlığın səbəbi və mümkün həlli barədə rəsmi açıqlama verməyib.
