“Apple” şirkətinin daxili kameralara malik yeni “AirPods” qulaqlıqları üzərində çalışdığına dair şayiələr yenidən alovlanıb. Bəzi mənbələr layihənin ləğv olunduğunu bildirsə də, şirkətin hazırda sınaqdan keçirdiyi iOS 27 Beta 2 əməliyyat sisteminin daxili kodları bu innovativ cihazın hələ də aktiv inkişaf mərhələsində olduğunu sübut edib.
Yeniliyin kəşf müəllifi olan proqram təminatı tərtibatçısı Sam Henri Gold sistemin dərinliklərində “B790” kod adlı sirrli bir cihazın qeydlərini tapıb. Koddakı ən diqqətçəkən hissə isə birmənalı şəkildə “istifadəçinin başının hər iki tərəfindəki kameralardan alınan iki görüntü” ifadəsinin yer almasıdır. Bu texniki detal səs-küylü layihənin heç də uydurma olmadığını bir daha təsdiqləyir.
Lakin qeyd etmək lazımdır ki, qulaqlıqlardakı daxili infraqırmızı kameralar bizim öyrəşdiyimiz ənənəvi foto və ya video çəkilişləri üçün nəzərdə tutulmayıb. Mütəxəssislərin sözlərinə görə, əsas məqsəd bu ilki “WWDC26” tədbirində tanıdılan yeni nəsil Siri köməkçisinə vizual kontekst qazandırmaqdır. Kameralar vasitəsilə Siri istifadəçinin ətrafındakı mühiti “görərək” analiz edəcək və “Apple Intelligence” imkanları ilə daha dəqiq, məkanla bağlı cavablar verəcək.
Maraqlıdır ki, cihazın cari vəziyyəti barədə sızdırmaçılar arasında ciddi fikir ayrılıqları var. Məşhur “Bloomberg” analitiki Mark Qurman məhsulun son sınaq mərhələsinə çatdığını bildirsə də, daha əvvəllər layihə barədə ilk məlumatları yayan “Kosutami” adlı insayder bu günlərdə layihənin dondurulduğunu iddia edib.
Bütün bu fərqli fərziyyələrə və ehtimal olunan təxirəsalmalara baxmayaraq, “Apple” ekosistemini yaxından izləyənlər böyük intizar içindədir. Əgər texniki problemlər həllini taparsa və “Kosutami”nin iddiaları özünü doğrultmazsa, süni intellekt dəstəkli və kameralı bu inqilabi qulaqlıqların bu ilin sentyabr ayında keçiriləcək ənənəvi payız təqdimatında rəsmən nümayiş olunması gözlənilir.
