ASUS şirkətinin mobil sektorda ayaqda qalmasını təmin edən ROG Phone 6 seriyası bu gün yenilənib. Oyun həvəskarları üçün hazırlanmış ROG Phone 6 seriyası 2 yeni modellə birgə qarşımıza çıxıb. Uyğun olaraq ROG Phone 6 və ROG Phone 6 Pro kimi adlandırılmış bu modellərə gəlin daha yaxından nəzər salaq.
ROG Phone 6 seriyası ən yüksək performansı axtaranlar üçündür!
Belə ki, hər iki cihaz öz gücünü Snapdragon 8+ Gen 1 çipsetindən alır. Smartfonlar LPDDR 5 operativ yaddaş və UFS 3.1 yaddaş texnologiyalarına malikdir. Lakin ROG Phone 6 Pro modeli üçün ASUS şirkəti 18GB operativ yaddaşa malik variantını da təqdim edir. Bu qədər böyük tutumlu RAM olmasına həqiqətən ehtiyac varmı, müzakirə mövzusudur. Lakin istehsalçı firma təchiz etməkdən çəkinməyib.
ROG Phone 6 Pro seriyasında aktiv soyutma sistemi mövcud deyil. ASUS tərəfindən modellərə hər hansı bir pər və.s quraşdırılmayıb. Firma sadəcə ənənəvi soyutma texnologiyalarından yararlanıb. Bununla smartfonlar 10°C-ə qədər daha sərin işləyə bilir.
Aktiv soyutma sistemi yerinə ASUS sizin üçün smartfonun arxasına quraşdıra biləcəyiniz AeroActive adı verilən xüsusi soyutma avadanlığını hazırlayıb. Daha yaxşı soyutma istəyirsinizsə bu smartfonlara 1000€ ödədikdən sonra qutudan çıxmayan həmin avadanlığı ala bilərsiniz.
ROG Phone 6 seriyasının dizayn elementləri və kamerası
Smartfonların gövdəsi əslində eynidir. Sadəcə arxa tərəfdə müəyyən dəyişikliklər edilib. Sadə ROG Phone 6 modelində aşağıda gördüyünüz kimi fərqli bir dizayn seçilib. Pro model kimi funksional arxa ekrana sahib deyil. Yalnız adi ROG imzalı RGB loqotipə müxtəlif müdaxilələr edə bilərsiniz.
ROG Phone 6 Pro modelindəki arxa ekran isə nisbətən daha funksionaldır. Batareya vəziyyəti, gələn zənglər, bildirişlər, rejim dəyişiklikləri kimi müxtəlif müdaxilələr etməyə imkan verir.
Hər iki cihazın sağ və arxa hissələrində AirTrigger adı verilən oyun tətikləri (sensorları) yerləşdirilib. Sol üstə yerləşdirilən kamera modulu daxilində 50MP IMX766 baş sensoru, 13MP ultra-geniş bucaqlı sensor, 5MP makro sensorları yer alıb. Selfi kamerası 12MP təşkil edir.
ROG Phone 6 seriyası 165Hz AMOLED ekrana malikdir
Smartfonlar 6.78 düym ölçülü FHD+ AMOLED ekranla təchiz ediliblər. Ekran panellərinin tezliyi nə az, nə çox tam olaraq 165Hz-dir. İstəyə görə 60Hz, 90Hz, 120Hz, 144Hz olmaqla dəyişdirilə bilər. Lakin digər flaqmanlar kimi adaptiv deyil. Sensor tezliyi 165Hz olub, zərbələrə qarşı Corning Gorilla Glass Victus ilə qorunur. Ekran paneli Samsung tərəfindən istehsal olunub.
Smartfonun ekranının alt və üst hissəsində çıxıntı olduğunu görə bilərsiniz. Estetik cəhətdən pis görünsə də həmin hissədə istifadəçiyə doğru yerləşdirilmiş Dirac Virtuo imzalı 2 ədəd səs ucaldan səs keyfiyyətinə xeyli müsbət təsir göstərir. Smartfona 3 ədəd mikrofon və 3.5mm qulaqlıq girişi də quraşdırılıb.
Smartfonların batareyası, qiyməti və yerdə qalan detallar
Hər iki ROG Phone modeli iki hüceyrəli 6000mAs batareya ilə təchiz edilib. Smartfonların alt və sol tərəflərində 2 ədəd olmaqla Type-C girişi quraşdırılıb. 65 Vt sürətli doldurma dəstəkləyirlər. Su sıçramalarına qarşı IPX4 sertifikatına sahibdirlər. ROG UI əsaslı Android 12 əməliyyat sisteminə malikdirlər.
ROG Phone 6 Pro modelinin qiyməti:
- 18-512GB 1249€
ROG Phone 6 modelinin qiyməti:
- 12-256GB 999€
- 16-512GB 1149€
Əgər oyun oynamağı sevirsinizsə, bir-birindən güclü oyun notbukları və aksesuarları üçün Gamenote-u ziyarət etməyi unutmayın.
