Dünya sənayesinin nəhəngi olan Çin, süni intellekt texnologiyalarını istehsalatın hər sahəsinə tətbiq etməyə davam edir. Bu istiqamətdə atılan ən diqqətçəkən addımlardan biri də tekstildə təkrar emal prosesini kökündən dəyişən “Fastsort-Textile” sistemidir. Çinli “DataBeyond” şirkəti tərəfindən hazırlanan və 2025-ci ildə “Time” jurnalı tərəfindən ilin ən yaxşı icadlarından biri seçilən bu texnologiya, sintetik tullantıların ətraf mühitə vurduğu zərəri minimuma endirməyi hədəfləyir.
Xüsusi süni intellekt skanerləri ilə təchiz edilmiş bu nəhəng maşın, geyimlərin lif tərkibini insan gözünün görə bilməyəcəyi dəqiqliklə müəyyən edir. Məlumdur ki, qlobal tekstil istehsalının təxminən 70%-i sintetik materiallardan ibarətdir və onların əllə çeşidlənməsi həm zaman aparır, həm də xəta payını artırır. Lakin yeni texnologiya sayəsində tekstildə təkrar emal artıq inanılmaz sürətlə həyata keçirilir. Belə ki, bir insanın təxminən 4 saata yerinə yetirdiyi 100 kiloqramlıq çeşidləmə işini bu maşın cəmi 2-3 dəqiqəyə tamamlayır. Əvvəllər 15 tonluq materialın çeşidlənməsi üçün 30-dan çox işçi tələb olunurdusa, indi cəmi 4 nəfər bütün prosesi idarə etmək üçün kifayət edir.
5×2 metr ölçülərində olan bu skaner sistemi, konveyer lenti üzərindən keçən geyimlərin tərkibindəki poliester və digər maddələrin miqdarını milisaniyələr ərzində hesablayır. Bu dəqiqlik əvvəllər 50% olan “təkrar emal edilə bilməyən” tullantı payını 30%-ə qədər endirib. Müəssisə rəsmilərinin bildirdiyinə görə, əsas hədəf robotların 24 saat fasiləsiz işlədiyi, insan müdaxiləsinə ehtiyac duyulmayan “qaranlıq fabriklər” modelinə keçid etməkdir. Çinin 142 milyard dollara çatan tekstil ixracatını nəzərə alsaq, bu texnologiyanın həm iqtisadi, həm də ekoloji baxımdan qlobal bazarda oyun qaydalarını dəyişəcəyi gözlənilir.
