Texnologiya dünyasında şəffaf dizayn imzası ilə tanınan “Nothing” şirkəti, indi də geyilə bilən texnologiyalar bazarına daxil olmağa hazırlaşır. “Bloomberg”in son hesabatına görə, brend özünəməxsus üslubu ilə fərqlənən, süni intellekt dəstəkli yeni bir smart eynək üzərində işləyir. Bu cihazın həm moda aksesuarı, həm də gündəlik köməkçi funksiyasını daşıyacağı gözlənilir.
Eynəyin əsas gücü onun təklif edəcəyi süni intellekt xüsusiyyətlərindədir. İstifadəçilər obyektləri tanımaq, mətni tərcümə etmək və ya səslə foto-video çəkmək kimi imkanlardan yararlana biləcəklər. Bundan əlavə, daxili dinamiklər və mikrofonlar sayəsində musiqi dinləmək və zəngləri cavablandırmaq da mümkün olacaq. “Nothing” bu funksiyaları daha əlçatan qiymət siyasəti ilə birləşdirməyi hədəfləyir.
Meta Ray-Ban-a güclü rəqib
Hazırda bazarda liderlik edən “Meta Ray-Ban” modellərinə sərfəli və fərqli alternativ olacaq bu cihaz, kameradan mikrofona qədər geniş funksionallıq vəd edir. Şirkət özünün smart eynək modelini “Nothing Phone (4a) Pro” modelindəki kimi şəffaf gövdə və LED işıqlandırma ilə təchiz etməyi planlaşdırır. Lakin bir texniki məqam var: sorğular birbaşa cihazda deyil, bulut serverlərdə emal ediləcəyi üçün eynək mütləq smartfona bağlı işləməlidir.
Şəffaf dizaynlı və süni intellektli bu cihazların 2027-ci ilin birinci yarısında satışa çıxarılacağı ehtimal edilir. Əgər şirkət həm praktik istifadəni, həm də vizual estetikani balanslaşdıra bilsə, “Nothing” brendinin bu məhsulu niş bazarında kütləvi marağa səbəb ola bilər.
