“Rəqəmsal Keçidlər: Süni İntellekt Dövründə İnformasiya və Media Dayanıqlılığının Gücləndirilməsi” mövzusunda 3-cü Şuşa Qlobal Media Forumu start götürüb və maraqlı çıxışlar, müzakirələr ilə davam edir.
Şuşa Qlobal Media Forumu bu il “Rəqəmsal Keçidlər: Süni İntellekt Dövründə İnformasiya və Media Dayanıqlılığının Gücləndirilməsi” mövzusuna həsr olunur. Sürətlə dəyişən informasiya mühitində rəqəmsal texnologiyaların mediaya təsiri, süni intellektin xəbər istehsalı və yayımındakı artan rolu, cəmiyyətin düzgün informasiya ilə təmin olunmasında media savadlılığının əhəmiyyətinə dair müzakirələrin aparılması məqsədilə Forumda 52 ölkədən 140-a yaxın xarici qonaq, o cümlədən 30-dan çox informasiya agentliyi, 7 beynəlxalq təşkilat və 80-ə yaxın media qurumu, həmçinin sahə üzrə əlaqəli digər təşkilatlardan nümayəndələr iştirak edir.
Forumda “İnnovativ yanaşmalar: Rəqəmsal dövrdə media savadlılığı”, “Media savadlılığı informasiya təhlükəsizliyinin təminatı kimi” və “Sosial medianın təkamülü ictimai etimada necə təsir edir: Media savadlılığının əhatəsində” adlı 3 panel sessiyanın, bununla yanaşı “Süni intellekt dövründə jurnalistika: Avtomatlaşdırma şəraitində həqiqətin qorunması” mövzusunda təkbətək görüşün təşkil olunması nəzərdə tutulub.
Forum çərçivəsində Qarabağın zəngin mədəni irsi və tarixi abidələrinə həsr olunmuş açıq hava sərgisi, Türk dünyasında informasiya və media sahəsində həyata keçirilən fəaliyyətlər barədə TDT-nin məsul nümayəndələrinin təqdimatları, həmçinin “Təyinat: Şuşa, Azərbaycan” sənədli filminin nümayişi baş tutacaq. Bununla yanaşı, “Mədəni irs və yeni media” və “Gələcək nəsil auditoriya və medianın tələblərinə uyğunlaşmaq” mövzularında paralel tədbirlər keçirilir.
Ümumilikdə panel müzakirələr və görüşlər zamanı süni intellektin informasiya istehsalında yaratdığı imkanlar və risklər, dezinformasiyanın yayılmasının qarşısının alınmasında media savadlılığının rolu, sosial medianın ictimai etimada təsiri ətraflı şəkildə təhlil olunur.
İyulun 19-da Azərbaycan Respublikasının Prezidenti İlham Əliyevin Xankəndidə “Rəqəmsal keçidlər: Süni intellekt dövründə informasiya və media dayanıqlılığının gücləndirilməsi” mövzusunda III Şuşa Qlobal Media Forumunun iştirakçıları ilə görüşü keçirilib. Prezident İlham Əliyev Forum iştirakçılarının suallarını cavablandırıb. Həmçinin Azərbaycan Prezidentinin köməkçisi – Prezident Administrasiyasının xarici siyasət məsələləri şöbəsinin müdiri Hikmət Hacıyev III Şuşa Qlobal Media Forumu zamanı öz çıxışları ilə vacib mövzulara toxunub.
3-cü Şuşa Qlobal Media Forumunda elmi-texnoloji mövzuda ötən günün ən çox önə çıxan məqamlarından biri Prezident İlham Əliyevə “Siz süni intellektdən istifadə edirsinizmi?” mövzusunda sual olub:
Prezident İlham Əliyev: Sağ olun. Yox, mən özüm istifadə etmirəm. Amma ailə üzvlərim var ki, ondan istifadə edirlər. Mənə də bəzən bu barədə məlumat verirlər. Amma yəqin ki, nə vaxtsa, mən də istifadə edəcəyəm. Çünki süni intellektin yayılması o qədər sürətlə gedir ki, istifadəçilərin sayı çox olacaq. Əsas odur ki, süni intellekt bizi bildiyimiz kriteriyalardan, meyarlardan uzaqlaşdırmasın
Həmçinin cənab Hikmət Hacıyev də süni intellekt timsalında bəzi vacib məqamlarla bağlı fikirlərə aydınlıq gətirib:
Hikmət Hacıyev: Üç il ardıcıl gözəl Şuşa şəhərində Qlobal media forumu keçirilir. Niyə məhz bu şəhər? Şuşa, müəyyən mənada, Azərbaycan xalqının tarixidir, yaradıcılıq üçün ilham yeri olub. Və bir çox Azərbaycan mütəfəkkirləri, filosofları, yazıçıları, o cümlədən jurnalistləri bu şəhərdə doğulub və bu şəhərdə yaradıblar. Buna görə də, bu ənənəni davam etdirərək, biz ilhamverici nəğməni Şuşa şəhərinə qaytarmaq istərdik
Dünən dövlət başçısı da bu məsələ barədə ətraflı danışdı. Biz burada bir neçə kateqoriyada və bir neçə təsnifatda ölkəmizə qarşı hücumları fərqləndirməliyik. Burada ilk növbədə Qərb media dairələrindən ölkəmizə qarşı hücumlar dayanır. Ancaq bu gün nədənsə dezinformasiyadan danışarkən ilk olaraq sosial media və ya süni intellekt platformaları ön plana çəkilir. Halbuki Azərbaycanın təcrübəsində görə bilərik ki, kifayət qədər nüfuzlu media qurumları Azərbaycana qarşı sistematik şəkildə dezinformasiya kampaniyasının aparılmasında ön sıradadırlar
Bugünkü Şuşa Qlobal Media Forumu süni intellektə həsr olunub. Hər il biz ən vacib və aktual mövzuları seçməyə çalışırıq. Bu gün süni intellekt ətrafında müxtəlif müzakirələr gedir. Bu təhdiddir, yoxsa fürsət? Mən burada texnologiyalara qarşı mübarizəyə çağırmıram
Başa düşürsünüz, yeni nəsillər də bizi buna görə tənqid edəcəklər. Onlar da bunu Cordano Bruno və digər mütəfəkkirlərin fikirlərinə qarşı mübarizə kimi qəbul edəcəklər – yel dəyirmanları ilə döyüş kimi. Eyni zamanda, gələcək nəsillər eyni vaxtda bizi nəzarət etmək mümkün olmayan və qeyri-müəyyənlik yaradan bir konsepsiyanın yaranmasına səbəb olduğumuz üçün qınayacaqlar
Süni intellektin məhsulu olan bir məqaləni Azərbaycanın media orqanlarından birində yerləşdirdik. Ancaq heç kim onu süni intellektin hazırladığını ayırd edə bilmədi
Bu məsələlərdə beynəlxalq praktikaları öyrənirik. Bu gün tərcümə işinə baxsaq, Azərbaycan dilində hələ ki arxa səslərin təqdim olunmasında müəyyən texniki problemlər olsa da, rus və ingilis dillərindən tərcümənin təmin olunması baxımından yaxşı nəticələr var. Bir sıra media platformalarında bunlar artıq tətbiq olunur
O vurğulayıb ki, süni intellekt, şübhəsiz ki, bir çox şeyi dəyişir: “O cümlədən dini inanclarımıza və baxışlarımıza münasibətimizi. “Həqiqət dəyişdi. Həqiqət doğrudan da nadir və dəyərli bir aktivdir ki, indi o da təhlükə altındadır”, – deyə o qeyd edib.
