Apple CEO-su Tim Cook, X hesabında paylaşdığı mesaj ilə hər kəsin diqqətini cəlb edib. Belə ki, Tim-in sözlərinə görə Apple 19 fevralda sürpriz şəkildə Ailənin ən yeni üzvünü təqdim edəcək. Həmçinin, X-nin baş direktoru Elon Musk da bu paylaşımı yenidən paylaşaraq maraq yaradıb.
Tim Cook Apple şirkətinin yeni tədbirinin 19 fevralda keçiriləcəyi ilə bağlı məlumat versə də, dəqiq saat barədə heç bir məlumat verməyib. Bundan əlavə, o, hansı modelin paylaşılacağı ilə bağlı da məlumat verməyib. Lakin, Bloomberg-dən Mark Gurman hesab edir ki, bu yazı Apple-ın yeni iPhone SE elanı üçün tizerdir. Məhz bu səbəbdən hər kəs Apple şirkətinin 19 fevral tarixində sürpriz edərək yeni iPhone SE və ya 16E kimi adlandırılan modelini təqdim edəcəyini gözləyir.
Qeyd edək ki, daha əvvəl iPhone SE modelinin A18 çipseti ilə təchiz ediləcəyi və eyni zamanda smartfonun daha böyük 6,1 düymlük OLED displey, Face ID, USB-C portu, Apple Intelligence dəstəyi və bir çox başqa xüsusiyyətlərə sahib olacağı məlumdur. Bəs gələn həftə başqa yeni məhsullar açıqlanacaqmı? İlkin iddialar göstərir ki, yeni MacBook Air, iPad Air və giriş səviyyəli iPad modelləri gələn həftələrdə təqdim ediləcək. Ümumiyyətlə, Cook-un yazısı tədbirdən savayı təqdimatın tizeri də ola bilər. Ona görə də hər hansı elanın tədbirin özündə deyil, Apple veb saytındakı press-relizlərdə paylaşılacağı ehtimalı var. Bununla belə, Apple-ın keçən oktyabr ayında M4 çipləri ilə yeni iMac, Mac mini və MacBook Pro modellərini elan etdiyi zaman gördüyümüz kimi, YouTube-da yayımlanacaq bir elan da ola bilər.
