Huawei şirkəti sanksiyalar səbəbilə çətinlik çəkməyə davam etməsinə baxmayaraq yeni smartfonlar təqdim etməyə davam edir. Şirkətin rəsmi weibo hesabı üzərində verilmiş məlumata görə Huawei Nova 10 seriyası 1 həftə sonra, 4 iyul tarixində təqdim ediləcək. Buna baxmayaraq Çinli insayderlər smartfonun canlı görüntüləri və texniki xüsusiyyətlərini təqdimatdan əvvəl paylaşıblar. Flaqman dizayna və orta-üst seqment çipseti ilə qane edici performansa sahib smartfona daha yaxından nəzər salaq.
Nova 10 seriyasında bizi nələr gözləyir?
Seriya daxilində bizi tam olaraq neçə model gözlədiyini bilmədiyimizdən şəkildəki smartfonun timsalında sizə biraz cihazlar barədə bəhs edək. Huawei Nova 10 (Pro) premium görünüşü ilə ilk baxışdan üst seqment smartfon hissiyatı yaradır. Ön tərəfdən baxdıqda minimum kənar çərçivəli yanlardan qıvrımlı ekran panelinin sol üst hissəsində kameralar üçün həb şəkilli yer açılıb. Selfi kameralarından biri 4K görüntülər qeydə ala bilən 60MP təsvir ölçülü sensordur. İkinci kameranın istifadə məqsədi isə dəqiq deyil. Ola bilsin ya ultra-geniş bucaqlı kamera olacaq, ya da üzün skan edilməsi (kilid və təhlükəsizlik məqsədilə) üçün istifadə ediləcək.
Nova 10 Pro modelində 6.78 düymlük 2K təsvir ölçülü AM(OLED) ekran panel quraşdırılıb. Görüntü yeniləmə tezliyi 120Hz olacaq. Sadə versiyası olacaq Nova 10 modelində isə 6.67 düym ölçülü FHD+ təsvir ölçülü AM(OLED) ekran paneli quraşdırılacaq.
Arxa tərəfin dizaynında isə çox sadə, lakin sadəliyi qədər də mükəmməl görünən kamera modulu diqqət çəkir. Şəkildə də gördüyünüz kimi üç fərqli obyektivin kənarında qızılı rəngli elementlər elə işlədilib ki, sanki zinət əşyasına baxırmışsınız kimi təəssürat yaradır. Kamera modulu daxilində Huawei tərəfindən özəlləşdirilmiş 50MP RYYB əsas sensor, 8MP ultra-geniş bucaqlı və naməlum təsvir ölçülü dərinlik sensorları yerləşdirilib.
Smartfon öz gücünü 4G bağlantısına sahib Snapdragon 778G çipsetindən alır. Performansı bir çox cəhətdən yetərli olsa də nisbətən güclü bir çipset görmək xoş olardı. Lakin təəssüf ki, sanksiyalar səbəbilə bu çipsetə qane olmaq məcburiyyətindəyik. 4000mAh batareyası 66W sürətli doldurma dəstəkləyəcək. Qalınlığı sadəcə 6.8mm olan cihazın çəkisi 168 qram təşkil edəcək. Çatdıra biləcəklərimiz bu qədərdir. Cihazlar barədə daha çox məlumat və seriya daxilindəki modellərin qiyməti 4 iyulda keçiriləcək təqdimatdan sonra məlum olacaq.
