Toronto Universitetinin Tətbiqi Elmlər və Mühəndislik Fakültəsinin tədqiqatçıları titan kimi möhkəm, lakin strafor kimi yüngül nanomateriallar hazırlamaq üçün maşın öyrənməsindən istifadə ediblər. Bu yenilik avtomobildən tutmuş aviasiyaya qədər bir çox sənaye sahələrində böyük dəyişikliklərə səbəb ola bilər. Beləliklə, süni intellekt indi də titandan daha yüngül və daha güclü nanomateriallar yaradır.
Professor Tobin Filleterin rəhbərlik etdiyi komanda qeyri-adi güc, yüngüllük və fərdiləşdirmə imkanı təklif edən nanomaterialların layihələndirilməsinə nail olub. Bu materiallar eni cəmi bir neçə yüz nanometr olan kiçik, təkrarlanan tikinti bloklarından ibarətdir. Müqayisə üçün deyək ki, onların 100-ü yan-yana düzülsə, insan saçı qədər qalın olardı. Komanda nanoölçülü strukturların stress paylanmasını optimallaşdırmaq və davamlılığı artırmaq üçün çoxməqsədli Bayesian optimallaşdırma alqoritmindən istifadə edib. Bu alqoritm yalnız 400 məlumat nöqtəsinə ehtiyac duyub, müqayisə üçün deyək ki, ənənəvi üsullar isə 20.000-dən çox tələb edirdi. Beləliklə, daha kiçik, lakin yüksək keyfiyyətli verilənlər toplusu ilə səmərəli işləmək mümkün olub.
Bu təcrübə alimlərin nanoarxitektura materiallarını optimallaşdırmaq üçün maşın öyrənməsini tətbiq etdikləri ilk təcrübə olub. Araşdırmanın aparıcı müəllifi Peter Serles nəticələrin onları təəccübləndirdiyini bildirib. Alqoritm nəinki əvvəlki uğurlu dizaynları təqlid edə, həm də hansı həndəsi dəyişikliklərin işlədiyini təhlil edərək tamamilə yeni strukturları proqnozlaşdıra bilib. Tədqiqatçılar iki fotonlu polimerləşmə 3D printerindən istifadə edərək eksperimental yoxlama üçün prototiplər hazırlayıblar. Nəticədə, optimallaşdırılmış karbon əsaslı nanomateriallar mövcud dizaynların gücünü iki qat artırıb və sıxlığa görə titandan beş dəfə güclü olub.
