Süni intellektlə edilə biləcək işlərin demək olar ki, heç bir həddi yoxdur. Belə ki, bəzən fırıldaqçılar bundan öz mənfəətləri üçün istifadə edə bilərlər. Fransada yaşayan qadın məşhur aktyor Bred Pitt olduğunu iddia edən fırıldaqçının qurbanı olduğunu açıqlayıb. Maraqlısı budur ki, Bred Pitt olduğunu iddia edən fırıldaqçı süni intellekt sayəsində qadından 800 min avro vəsait əldə edib.
Qadınla saxta sosial media hesabı vasitəsilə əlaqə saxlayan fırıldaqçı süni intellektin yaratdığı videolar və montaj şəkilləri ilə özünü Bred Pitt kimi təqdim edib. Məlum olub ki, fırıldaqçı qadını aldadıb, böyrəyinin müalicəsi üçün təcili pula ehtiyacı olduğunu və Angelina Jolie ilə boşandığı müddətdə bank hesablarına daxil ola bilmədiyini bildirib. Qurban 53 yaşlı Anna milyonçu əri ilə çətin günlər keçirərkən İnstaqram vasitəsilə dələduzların tələsinə düşüb. Əvvəlcə xoş mesajlaşma ilə başlayan münasibət, süni intellektin dəstəklədiyi romantik jestlərlə irəliləyib. Saxta Bred Pittin göndərdiyi şeirlər və mesajlar Annaya təsir edib.
Ana əvvəlcə şübhələndiyini söyləsə də, süni intellekt tərəfindən yaradılan videolar və görüntülər onu fırıldaqçıya inanmağa vadar edib. Bir müddət sonra fırıldaqçı Annaya yeni həyat vəd edərək evlilik təklifi etsə də, prosesin əvvəlində qadının 9 min avro dəyərində “gömrük rüsumları” ödəməli olduğunu iddia edib. Sonrakı aylarda Anna fırıldaqçının tələblərinə cavab verib və getdikcə daha çox pul göndərib. Anna bütün prosesdə 800 min avrodan çox pul itirdiyini bildirib. Saxta Bred Pitt böyrək xərçəngindən müalicə aldığını iddia etsə də, Anna ona davamlı olaraq pul göndərməyə razı sala bilib. Heç vaxt videozənglərdə iştirak etməyən fırıldaqçı süni intellektin yaratdığı xəstəxana görüntüləri və videoları ilə etibarlılığını qoruyub saxlayıb. Fırıldaqçıya göndərilən pullar təxminən iki il izlənilsə də, fırıldaqçıların izlərini peşəkarcasına gizlətdikləri bildirilir. Baş verənlərdən sonra Anna ağır depressiyadan əziyyət çəkməyə başlayıb və hazırda klinikada müalicə alır.
