Samsung Galaxy S25 seriyasının rəsmi təqdimatına cəmi bir həftə qalıb və artıq smartfonun təqdimat görüntüləri belə sızdırılıb. Belə ki, məşhur analitiklərdən olan Evan Blass Samsung-un çox gözlənilən smartfonlarının təqdimat şəkillərini paylaşıb. Sızdırılan görüntülərdə isə Galaxy S25, S25+ və S25 Ultra-nın dizaynı aydın şəkildə görünür.
Galaxy S25 təqdimat şəkilləri adı altında iki şəkil sızdırılıb. Bunlardan birincisi Galaxy S25 və S25+-ı göstərir. Galaxy S25 Ultra modeli isə ayrıca görünür. Sızdırılan görüntülərdə diqqət çəkən ilk detallardan biri Galaxy AI etiketidir. Deyəsən, Samsung yeni cihazlarında süni intellekt haqqında çox danışacaq. Onun xüsusi olaraq Bixby-nin yeni süni intellekt imkanları haqqında danışacağı gözlənilir. Təqdimat görüntüsündə Galaxy S25 Ultra-nın sələflərindən daha kəskin kənarları və daha incə çərçivələri olduğu görünür. Cihazı Titanium Silver Blue adlandırıla bilən yeni mavi rəngində görürük. Bunun əksinə olaraq, Galaxy S25 və S25 Plus sürməyi rəngdə görünür.
Qeyd edək ki, Samsung S25 seriyasının hər üç modelinin Snapdragon 8 Elite prosessoru ilə gəlməsi gözlənilir. Habelə, Galaxy S25 modeli 6.2 düymlük Dynamic AMOLED 2X Full HD+ təsvir ölçülü, S25 Plus 6.7 düymlük WQHD təsvir ölçülü, S25 Ultra isə 6.9 düymlük WQHD təsvir ölçülü ekran ilə təchiz ediləcək. Habelə, Galaxy S25 Ultra modeli 200MP əsas kamera, 50MP ultra geniş bucaqlı və 50MP periskop telefoto kamerası ilə istifadəçilərinə keyfiyyətli təcrübə təklif edəcək. Smartfonların isə gələn həftə təqdim edilməsi gözlənilir.
