Avtomobil sənayesinin zirvəsində yerləşən şirkətlərdən Mercedes-Benz bu ilin yanvar ayında Vision EQXX konseptini nümayiş etdirmişdi. Sanki Vision EQXX modeli ilə Mercedes sübut etmək istəyir ki, bir prototip avtomobil nəyə qadir ola bilər. Başqa istehsalçılar prototipi bir dəfə nümayiş üçün göstərərkən, Mercedes-Benz şirkəti bu modelin real həyatdan çəkilmiş möhtəşəm görüntülərinin fonunda bir çox maraqlı test həyata keçirib.
Mercedes-Benz, tək şarjla maksimum məsafə rekordunu Vision EQXX prototipi ilə yeniləyib!
Mercedes Vision EQXX prototipi 100 kVt/saat tutuma malik batareya paketi ilə təchiz edilib. Batareya tutumu Mercedes EQS modelinin 107.8 kVt/saat batareyasına çox yaxındır. Lakin Vision EQXX modelinin təkmilləşdirilmiş, enerji sıxlığı yüksək olan batareya paketinin həcmi həm 50% daha kiçikdir, həm də çəkisi 30% daha azdır. Əlavə olaraq mükəmməl aerodinamikasının (0,17 hava müqaviməti əmsalı) və tavana quraşdırılmış günəş panellərinin də yaratdığı avantaj Vision EQXX modelinin yürüyüş məsafəsini xeyli artırır.
Prototipin ilk rekordu bu ilin aprel ayında qeydə alınıb. Vision EQXX, Almaniyadan Fransaya 12 saat 2 dəqiqə ərzində 1008 Km məsafə qət etmişdi. Hələ azmış kimi 15% enerjisi qalmışdı və bununla da təxminən 140 Km əlavə yol gedə bilərdi. Həmin rekordu qırarkən elektomobilin ortalama sürət 87.4 Km/s, maksimum sürət 140 Km/s olaraq qeydə alınıb.
Dünən təqdim edilən testlər isə aprel ayındakı 1008 Km rekordu təzələyərək 1202 Km-ə yüksəldib. Mercedes-Benz şirkəti bu dəfə Almaniyadan başladığı marşrutu İngiltərədə Silverstone trasında bitirib. Daha doğrusu, Almaniyadan gəlib Silverstone trasında da 11 dövrə atdıqdan sonra öz məqsədinə çatıb. Mercedes Vision EQXX modelinin bu sürüş zamanı ortalama sürəti 83 Km/s olub. Lakin maksimum sürət yenə də 140 Km/s olaraq qeyd olunub. Böyük bir ehtimalla sürət prototip modeldə limitləndirildiyi üçün 140 Km/s həddi keçilə bilmir. Qeyd edək ki, marşrutun tamamlanması 14 saat 30 dəqiqə çəkib.
Deyəsən, bir müddət sonra elektromobillərlə bağlı yerdə qalan çətinlik yalnız qiymət və doldurma stansiyalarının azlığı olacaq
Elektromobil bazarı çox sürətlə inkişaf etdiyindən 5-6 il əvvəl xəyal olaraq görünən 600-700Km rəqəmləri indi 1000-1200 Km kimi real rəqəmlərə çevrilib. Batareyanın doldurulmasına sərf olunan zaman da qat-qat azalıb. Bu gün bazarda 20 dəqiqəyə 482 Km məsafə qət edə biləcək qədər batareyasını doldura bilən elektromobillər mövcuddur. Əsas problem isə modellərin baha olması və artan elektromobillərin enerji doldurma stansiyaları ilə bağlı yaşadıqları problemlərdir. İnkişaf tempi bu cür davam edərsə bu problemlərin də bundan sonrakı 5-6 il ərzində həll olunduğunu görə bilərik.
