Google Təqvim populyarlığı və gündəlik işlərdə səmərəliliyi səbəbindən kibercinayətkarların hədəfinə çevrilib. Belə ki, yalnız dörd həftə ərzində minlərlə saxta Google Təqvim dəvət e-poçtunun göndərildiyi bildirilir.
Qeyd edək ki, Google Təqvim insanlara və bizneslərə günlərini səmərəli planlaşdırmağa kömək etmək üçün nəzərdə tutulmuş cədvəlləri təşkil etmək və vaxtı idarə etmək üçün ən yaxşı vasitələrdən biridir. Hətta Google Təqvim 500 milyondan çox insan tərəfindən istifadə olunur və 41 fərqli dildə mövcuddur. Buna görə də, Google Təqvimin populyarlığına və səmərəliliyinə görə onun kibercinayətkarların hədəfinə çevrilməsi təəccüblü deyil. Bu yaxınlarda Check Point-də kibertəhlükəsizlik üzrə tədqiqatçılar kibercinayətkarların Google alətlərindən (məsələn, Google Calendar) sui-istifadə etdiyini müşahidə ediblər. Saxta e-poçtların əksəriyyəti birbaşa Google Təqvimdən gəlir.
Kibercinayətkarlar, “göndərən” başlığını dəyişirlər ki, e-poçtlar məlum və etibarlı kontakt adından Google Təqvim vasitəsilə göndərilmiş kimi görünsün. Tədqiqatçıların fikrincə, hücumlar son bir neçə həftə ərzində daha çox yayılıb. Dörd həftə ərzində 300-dən çox brendi təqlid edən 4000-ə yaxın bu cür e-poçtun göndərildiyi bildirilir. E-poçtlarda Gmail, Microsoft Outlook və digər poçt xidmətlərinin e-poçt skan alətlərindən yan keçmək üçün Google Formalara və ya Google Rəsmlərə keçidi olan təqvim linki və ya fayl (.ics) var.
