İsveçrənin “Sun-ways” startapı ölkədəki dəmir yolu xəttinin 100 m xətti hissəsində 18 kVt gücündə pilot günəş enerjisi sistemi qurmağı planlaşdırır. Beləliklə, “Sun-ways” startapı sayəsində dəmir yollarında portativ günəş panelləri dövrü başlayıb deyə bilərik.
İsveçrə Federal Nəqliyyat İdarəsi (FOT) ölkənin ilk portativ günəş elektrik stansiyasının dəmir yolu xəttinə quraşdırılmasına icazə verib. Bu innovativ layihə Neuchâtel-də 100 metrlik dəmir yolu xəttinə quraşdırılacaq. Müvafiq quraşdırma İsveçrənin “Sun-ways” təşəbbüsü ilə həyata keçiriləcək. 2025-ci ildə həyata keçiriləcək bu pilot layihədə Sun-ways hər birinin gücü 380 Vt, ümumi gücü 18 kVt olan 48 paneldən ibarət fotovoltaik (PV) sistemi qurmağı planlaşdırır. Ümumi dəyəri 621 800 Avro (təxminən 685 920 ABŞ dolları) olan layihə istehsal olunan elektrik enerjisini yerli şəbəkəyə ötürəcək.
Bu fərqli günəş elektrik stansiyası ideyası ilk dəfə 2023-cü ildə gündəmə gətirilərkən, texnologiya üçün texniki istinadların olmaması səbəbindən FOT tərəfindən müvəqqəti olaraq rədd edilmişdi. Ancaq Sun-ways iki professorun müstəqil qiymətləndirmə aparması ilə layihəni yenidən gündəmə gətirib. Bundan əlavə, irimiqyaslı dəmir yolu mühəndisliyi layihələrində mütəxəssis olan Geste Engineering sistemin texniki və təhlükəsizlik təhlilini həyata keçirib. Yoxlamalar nəticəsində elektrik stansiyasının dəmir yolu xəttinin təhlükəsizlik meyarlarına tam uyğun olduğu müəyyən edilib. Sun-ways bildirir ki, dəmir yolu xəttinə quraşdırılan bu sistem Alp dağlarında günəş elektrik stansiyası ilə bağlı müzakirələrə, istifadə olunmayan ərazilərdən istifadə etməklə və qatarların hərəkətinə maneçilik törətmədən həll yolu təklif edir. Şirkət vurğulayır ki, bu layihə həm dəmiryolunun təmiri, həm də yoxlanma işlərini pozmadan davam etdirilə bilər.
