Samsung brendi qatlanan bilən ekranlara sahib smartfonlardan sonra yuvarlanan ekranlı smartfon təqdim etmək istəyir. Belə ki, açıldığında 12,4 düym ölçüsündə olması gözlənilən smartfon satışa çıxacağı təqdirdə sənayedə bir ilk olacaq.
Smartfon istehsalçıları müxtəlif forma faktorları olan smartfonları hazırlamağa davam edirlər. Qatlana bilən smartfonlar getdikcə daha çox yayılmağa davam etsə də, görünən odur ki, gələcəkdə yuvarlanan və ya sürüşən ekranlı smartfonlar da bazarda çoxluq təşkil edəcək. Bu smartfonlar üzərində işləyən istehsalçılardan biri də Samsungdur. Cənubi Koreyanın texnoloji xəbər saytı Elec-in məlumatına görə, Samsung 2025-ci ilin ikinci yarısında üzərində işlədiyi yuvarlana bilən ekranlı smartfonu təqdim edə bilər. Mənbə iddia edir ki, smartfon açıldığı zaman 12,4 düymlük ekrana sahib olacaq və Huawei-nin keçən həftə təqdim etdiyi üç qatlanan Mate XT Ultimate smartfonunun 10,2 düymlük ekran ölçüsünü ötəcək. O, həmçinin bildirir ki, smartfonun ekran altı kamerası olacaq.
Beləliklə, Samsung dünyada yuvarlanan ekranlı smartfon təqdim edən ilk istehsalçı olaraq tarixə keçmək niyyətindədir. 2019-cu ildə ilk qatlana bilən smartfonu Galaxy Fold-u bazara çıxaran və bu sahədə qabaqcıl olan Samsung, Huawei və Xiaomi kimi Çin istehsalçılarının uğurlu modellərindən sonra qatlanan smartfon satışlarında liderliyini itirmək təhlükəsi ilə üzləşib. Samsung, yeni smartfonu ilə sənayedəki mövqeyini yenidən bərpa etməyi də hədəfləyir.
