Bir çox sahədə xüsusilə elektrikli avtomobil və texnologiya sahəsində ABŞ mərkəzli şirkətlər ilə rəqabət aparan Çin indi süni intellekt tərəfində rəqabət aparacaq. Belə ki, Çinin texnologiya nəhəngləri, ABŞ mərkəzli süni intellekt sistemlər ilə rəqabət apara biləcək süni intellekt texnologiyalarını təqdim etməyə davam edir. Qeyd edək ki, son həftələrdə təqdim edilən bu süni intellekt texnologiyaları artıq tərtibatçılar və istifadəçilər üçün açıqdır.
Bu ay Şanxayda keçirilən Ümumdünya Süni İntellekt Konfransında Kuaishou startapının yaradıcısı Qu Dongqi, Kling adlı süni intellekt texnologiyası ilə yaradılmış videonu təqdim edib. Kling, Amerika mərkəzli startap olan OpenAI-nin video yaradan süni intellekti Sora-ya bənzərdir. Lakin, Kling Soradan fərqli olaraq sadəcə bir ay əvvəl təqdim edilib və artıq geniş istifadəçi kütləsinə sahibdir. Bundan qısa müddət əvvəl isə 01.AI adlı startap çatbotlar yaratmaq üçün istifadə edilən Yi-Large Global SOTA LLM adlı böyük dil modelini təqdim etmişdi. Bu model performans qiymətləndirmə testlərində amerikalı həmkarları GPT-4 və Llama-3 kimi yüksək nəticə göstərmişdir.
Ümumiyyətlə, süni intellekt sıçrayışı 2022-ci ilin sonunda ABŞ-da ChatGPT-nin təqdim edilməsi ilə başlamışdı. Lakin, Çin şirkətləri mövcud süni intellekt texnologiyalarını inkişaf etdirmək və təkmilləşdirmək üçün açıq mənbə kodlarından istifadə etməklə tez bir zamanda Amerikalı şirkətlərə çatırlar. ABŞ-ın ixrac məhdudiyyətləri Çin şirkətlərinin Nvidia-nın qabaqcıl süni intellekt sürətləndiricilərinə çıxışını çətinləşdirsə də, onların proqram təminatı sahəsində Amerikalı həmkarları ilə rəqabət apara bilməsi qaçınılmazdır. Hətta ABŞ indi açıq mənbə texnologiyasının istifadəsini məhdudlaşdırmağa çalışır. Lakin, bu addım ABŞ üçün də zərərli ola bilər.
