Elon Musk uzun müddətdir gecikən Tesla Roadster üçün iddialı açıqlamalar verib. Belə ki, Elon Musk Tesla Roadster modelinin böyük bir yenilənmə ilə uça biləcəyini söyləməklə hər kəsin diqqətini çəkməyi bacarıb. Qeyd edək ki, ilk dəfə 2017-ci ildə təqdim edilən Tesla Roadster indiyə qədər ən yüksək performansa sahib olan Tesla modeli olaraq da tanınır.
Tesla şirkətinin baş icraçı direktoru olan Elon Musk X şəbəkəsində Tesla Roadster modelinin uça biləcəyini iddia edərək böyük maraq cəlb edib. Musk, SpaceX paketi sayəsində Roadster-in havada uça bildiyini və qısa müddət ərzində uçmaq qabiliyyətinə malik olduğunu açıqlayıb. Onun sözlərinə görə, avtomobildəki soyuq qaz təkanları onu havaya qaldıra bilir. Hələlik isə o, bu iddiasını dəstəkləmək üçün əlavə məlumat paylaşmayıb.
Tesla Roadster ilk dəfə təqdim edildikdən sonra onun buraxılması üçün hər kəs maraqla gözləyirdi. Xatırladaq ki, avtomobil 7 il əvvəl Tesla-nın Semi and Roadster tədbiri zamanı elan edilmişdi. Rodsterin ilkin olaraq 0-dan 100 km/saat sürəti 1,9 saniyəyə sürətlənir. Bu sürətlənmə o vaxt təsirli idi, amma indi bir çox rəqibləri mövcuddur deyə bilərik. Daha yaxşı sürət göstəricilərinə malik olan bir neçə Tesla və Lucid avtomobili var ki, onlar 100 km/saat sürətinə 2 saniyədən az vaxtda çata bilir. Bundan əlavə, Roadster ilə eyni kateqoriyada olan superkarlar bu göstəriciyə 1,7 saniyəyə çata bilirlər. 2021-ci ildə Elon Musk Tesla Roadster-in 0-100 km/saat sürətini 1,1 saniyəyə yığa biləcəyini iddia etmişdi. Avtomobilin ətrafında yerləşdirilən 10-a qədər kiçik raket gücləndiricisini ehtiva edən SpaceX opsiya paketi ilə təchiz ediləcəyi də bildirilmişdi. İndi isə Elon bu kiçik raket gücləndiriciləri ilə elektromobilin uça biləcəyini də bildirir.
