Alimlər tərəfindən aparılan yeni bir araşdırmada süni intellekt Parkinson xəstəliyini simptomları başlamazdan illər əvvəl 100 faiz dəqiqliklə proqnozlaşdıra bilib. Dünyanın ən sürətlə inkişaf edən neyrodegenerativ xəstəliyi olan Parkinson hazırda dünyada təxminən 10 milyon insana təsir edir. Bu kontekstdə, UCL və Goettingen Universitetinin Tibb Mərkəzinin alimlərindən ibarət tədqiqat qrupu, simptomların başlamasından yeddi il əvvəl Parkinson xəstəliyini proqnozlaşdırmaq üçün süni intellektdən istifadə edən sadə qan testi hazırlayıb.
Qeyd edək ki, Parkinson xəstəliyi beynin hərəkətə nəzarət edən hissəsindəki sinir hüceyrələrinin ölümü ilə nəticələnən mərhələli xəstəlikdir. Bu sinir hüceyrələri beynin müvafiq hissəsində zülal yığılması səbəbindən dopamin adlı mühüm kimyəvi maddə istehsal etmək qabiliyyətini itirərək ya ölür ya da fəaliyyəti pozlulur. Hal-hazırda Parkinson xəstələri titrəmə, hərəkət yavaşlığı və yaddaş problemləri kimi simptomlar inkişaf etdikdən sonra dopamin əvəzedicilər ilə müalicə olunur. Lakin tədqiqatçılar hesab edirlər ki, erkən proqnoz və diaqnoz dopamin istehsal edən beyin hüceyrələrini qorumaqla Parkinson xəstəliyini yavaşlada və ya dayandıra biləcək müalicələri tapmaq üçün dəyərlidir. Beyin hüceyrələrini bərpa edə bilmədiyimiz üçün ən məntiqli həll əlimizdə olanları qorumaqdır.
Nature Communications-da dərc edilən bu yeni araşdırma, klinik sınaqda maşın öyrənmə alqoritmi sayəsində xəstəliyin diaqnozunda 100% dəqiqliyə nail olunduğunu ortaya qoyub. Komanda daha sonra testin bir insanın Parkinson xəstəliyinə tutulma ehtimalını proqnozlaşdıra biləcəyini yoxlamaq üçün təcrübələr aparıb. Tədqiqatçılar bunu Sürətli Göz Hərəkəti Davranış Pozğunluğu (iRBD) olan 72 xəstənin qanını analiz edərək ediblər. Maşın öyrənmə aləti bu xəstələrin qanını təhlil edərkən, iRBD xəstələrinin 79%-nin Parkinson xəstələri ilə eyni profilə malik olduğunu aşkar edib. Komanda 16 xəstənin Parkinson xəstəliyinə tutulacağını düzgün proqnozlaşdırmağı bacarıb və bunu hər hansı bir simptomun başlamasından yeddi il əvvəl təxmin edib. Komanda indi testin düzgünlüyünə daha da əmin olmaq üçün Parkinson xəstəliyinin inkişaf edəcəyi proqnozlaşdırılan xəstələri izləməyə davam edir.
