4SİM ilə Efiopiyanın Süni İntellekt İnstitutu arasında əməkdaşlıq və birgə layihələrin həyata keçirilməsi müzakirə olunub.
Mayın 16-da Dördüncü Sənaye İnqilabının Təhlili və Koordinasiya Mərkəzinin icraçı direktoru Fariz Cəfərov ölkəmizdə səfərdə olan Efiopiya Süni İntelekt İnstitutunun Baş direktoru Vorku Qaçena Negera ilə görüşüb.
Görüşdə hər iki qurumun fəaliyyət istiqamətləri barədə təqdimatlar baş tutub. 4SİM-in həyata keçridiyi layihə və təşəbbüslər, həmçinin “Rəqəmsal iqtisadiyyatın inkişafı üzrə Strategiya” barədə məlumat verilib. Efiopiya Süni İntellekt İnstitutunun kənd təsərrüfatı, səhiyyə, nəqliyyat, təhlükəsizlik sahəsində layihələri və institutun nəzdində fəaliyyət göstərən Efiopiya Elm muzeyinin fəaliyyəti təqdim olunub.
Tərəflər süni intellekt, data elmləri və rəqəmsal texnologiyalar sahəsində mümkün tədqiqat və əməkdaşlıq imkanları, habelə təcrübə mübadiləsi ilə bağlı müzakirələr aparıblar. Cari ilin yay aylarında Efiopiya Süni İntellekt İnstitutunun 200 tələbəsi üçün təşkil olunacaq yay düşərgəsində 4SİM tərəfindən süni intellektlə bağlı təlimin keçirilməsi barədə razılıq əldə olunub.
